Ársreikningur Sandgerðisbæjar fyrir árið 2011 er lagður fram til fyrri umræðu í bæjarstjórn í dag 3. apríl. Seinni umræða um reikninginn fer fram 2. maí. Á árinu var unnið að endurskipulagningu á rekstri sveitarfélagsins og ber ársreikningurinn keim af þeim miklu aðhaldsaðgerðum sem unnið hefur verið að.
Í því sambandi er vert að benda á að framlegð sveitarfélagsins sem er heildartekjur þess að frádregnum launum, launatengdum gjöldum og öðrum rekstrarkostnaði hefur farið úr því að vera neikvæð í A hluta um 7,2% í jákvæða framlegð sem nemur 8,5%. Framlegð í A og B hluta er jákvæð sem nemur 13,9% í A og B hluta. Á árinu 2010 var samsvarandi landsmeðaltal í A hluta um 8% og í A og B hluta um 18%. Sambærilegt landsmeðaltal fyrir árið 2011 liggur ekki fyrir. Samkvæmt samþykktum fjárhagsáætlunum sveitarfélagsins stefnir framlegð sveitarfélagsins fyrir A og B hluta í að verða yfir 20% og er þá komin vel yfir landsmeðaltal.
Rekstrarniðurstaða sveitarfélagsins þegar afskriftum og fjármagnsliðum hefur verið bætt við framlegðina var neikvæð um 447 mkr. í A og B hluta sem lýsir best þeim vanda sem sveitarfélagið stendur frammi fyrir. Fjármagnsgjöld að frádregnum fjármagnstekjum voru neikvæð um 445 mkr. Verðbætur og gengismunur vega þungt í þessari niðurstöðu en verðbólga nam rúmum 5% á árinu 2011. Á árinu 2010 voru fjármagnsliðir jákvæðir um 45 mkr. sem skýrist einkum af gengishagnaði af skuldum og skuldbindingum.
Veltufé frá rekstri í A og B hluta sveitarfélagsins var neikvætt um 6,8 mkr. sem í raun þýðir að sveitarfélagið greiddi að mestu vexti af öllum skuldbindingum í samræmi við samninga en hafði ekki fé aflögu frá rekstri til greiða afborgair skulda.
Fjármögnunarhreyfingar námu 475 mkr. og var gengið á handbært fé til greiðslu afborgana.
Í nýjum sveitarstjórnalögum er gert ráð fyrir að sveitarfélög skuldi ekki meira en sem nemur 150% af heildartekjum sínum. Í árslok 2011 var þetta skuldahlutfall 388% en var í lok árs 2010 455%. Skuldir í lok árs 2011 nema um 3,1 mkr. á íbúa. Líta ber þó til þess að sveitarfélagið á miklar eignir á móti þessum skuldum eða um 3,6 mkr. á íbúa, þar af er handbært fé í sjóði rúmur einn milljarður króna eða tæpar 700 þúsund kr. fyrir hvern íbúa. Sé handbært fé dregið frá skuldum sveitarfélagsins nemur skuldahlutfallið um 300% af heildartekjum.
