Ágúst Helgi Leósson lætur af starfi framkvæmdastjóra fjármálasviðs og hverfur til nýrra starfa. Ágústi eru þökkuð vel unnin störf í þágu félagsins og jafnframt óskað velfarnaðar á nýjum vettvangi. Sigríður Hrólfsdóttir hefur verið ráðin framkvæmdastjóri fjárfestinga- og fjárstýringarsviðs TM. Sigríður mun jafnframt gegna starfi framkvæmdastjóra fjármálasviðs félagsins. Sigríður starfaði sem framkvæmdastjóri fjármálasviðs hjá Hf. Eimskipafélagi Íslands árin 2000-2004 og sem forstöðumaður fjárstýringar hjá Eimskip árin 1998-2000. Frá 1994 til 1998 starfaði Sigríður hjá Íslandsbanka við fjárstýringu, áhættustýringu og gjaldeyrisviðskipti. Sigríður er viðskiptafræðingur frá Háskóla Íslands og með MBA próf frá University of California í Berekeley. Sigríður mun hefja störf 10. maí nk. Ragnheiður Agnarsdóttir tekur við starfi framkvæmdastjóra vátrygginga- og fjármálasviðs hjá TM í stað Péturs Péturssonar, en Ragnheiður hefur síðastliðið ár starfað sem forstöðumaður einstaklingsviðskipta hjá félaginu. Á árunum 2001-2005 starfaði hún sem stjórnunarráðgjafi hjá ParX Viðskiptaráðgjöf IBM og forverum þess IBM BCS og PicewaterhouseCoopers. Ragnheiður er með BA próf í sálfræði frá Háskóla Íslands og vinnur að meistaraverkefni sínu við í mannauðsstjórnun við Viðskipta- og hagfræðideild sama skóla. Framkvæmdastjórn TM skipa nú auk Óskars Magnússonar forstjóra: Guðmundur Örn Gunnarsson framkvæmdastjóri viðskiptaþróunar, Hjálmar Sigurþórsson framkvæmdastjóri tjónaþjónustu, Óskar B. Hauksson framkvæmdastjóri rekstrarsviðs, Ragnheiður Agnarsdóttir framkvæmdastjóri vátrygginga- og fjármálaþjónustu og Sigríður Hrólfsdóttir framkvæmdastjóri fjárfestinga- og fjárstýringarsviðs og fjármálasviðs.