Stjórnir Sparisjóðs Skagafjarðar og Sparisjóðs Siglufjarðar hafa undirritað áætlun um samruna sparisjóðanna sem miðast reikningslega við 1. janúar 2007. Í tillögu sem lögð verður fyrir fund stofnfjáreigenda er gert ráð fyrir því að eigið fé hins sameinaða sjóðs verði u.þ.b. 1 milljarður króna. Í hinum sameinaða sjóði munu stofnfjáreigendur í Sparisjóði Skagafjarðar eiga 12% en eigendur stofnfjár í Sparisjóði Siglufjarðar 88%. Til að ná ofangreindri skiptingu hefur stofnfjáraðilafundur í Sparisjóði Siglufjarðar ákveðið að auka stofnfé í Sparisjóði Siglufjarðar um 516 milljónir Það er markmið stjórna sjóðanna með tillögu um sameiningu að efla starfsemi á starfssvæðum sínum og sækja fram á nýjum vettvangi. Stjórnirnar telja sameiningu sparisjóða nauðsynlega til að mæta kröfum tímans um alhliða og hagkvæma fjármálaþjónustu við einstaklinga og fyrirtæki. Þau markmið fara saman við þá skyldu að efla hag stofnfjáreigenda og starfsfólks sjóðanna. Stofnfjáraðilar í Sparisjóði Skagafjarðar eru um 140. Sjóðurinn var stofnaður árið 1907 og hét áður Sparisjóður Hólahrepps. Sjóðurinn starfaði í Hólahreppi fram til ársins 2000, þegar starfsemi hans var flutt til Sauðárkróks Sparisjóður Mýrasýslu á 99,9% af stofnfé Sparisjóðs Siglufjarðar og er hann dótturfélag Sparisjóðs Mýrasýslu. Sjóðurinn var stofnaður árið 1873 og er elsta starfandi peningastofnun landsins. Frekari upplýsingar veita Ólafur Jónsson, sparisjóðsstjóri Sparisjóðs Siglufjarðar og Kristján Snorrason sparisjóðsstjóri Sparisjóðs Skagafjarðar
- Stjórnir Sparisjóðs Skagafjarðar og Sparisjóðs Siglufjarðar hafa undirritað áætlun um samruna sparisjóðanna
| Source: Sparisjóður Mýrasýslu