• Velta Icelandair Group eykst um 30% frá 2006 • Samlegðaráhrif í alþjóðlegu leiguflugi • Verðmætar flugvélapantanir Icelandair Group hefur undirritað viljayfirlýsingu um kaup á tékkneska flugfélaginu Travel Service, stærsta einkarekna flugfélagi í Tékklandi. Travel Service rekur leiguflugsstarfsemi einkum frá Prag og Búdapest og á einnig og rekur lágjaldaflugfélagið Smart Wings. Heildarvelta Travel Service á árinu 2006 var um 18 milljarðar króna. Félagið rekur alls 12 Boeing 737-800 og 787-500 farþegaþotur, flutti um 1,8 milljónir farþega á síðasta ári og flýgur til 230 áfangastaða í fjórum heimsálfum. Á næstu vikum fer fram áreiðanleikakönnun og að henni lokinni er stefnt að frágangi samninga fyrir lok júní. Ef af verður mun Icelandair Group eignast 50% í félaginu fyrir mitt árið, og félagið allt á árinu 2008. Kaupin verða fjármögnuð að hluta til með lánsfé. Eftir kaupin verður áætluð velta Icelandair Group fyrir árið 2007 um 72 milljarðar króna, sem er um 30% aukning frá rekstrarárinu 2006. Áætlað er að velta Icelandair Group verði yfir 80 milljarðar króna á ársgrundvelli eftir kaupin á Travel Service. Jón Karl Ólafsson, forstjóri Icelandair Group segir: "Þessi viljayfirlýsing er í samræmi við stefnu Icelandair Group um vöxt í alþjóðlegu leiguflugi. Við höfum horft til austurhluta Evrópu þar sem við teljum okkur eiga erindi með þekkingu okkar og reynslu. Við keyptum á síðasta ári flugfélagið Latcharter í Lettlandi, sem gengur mjög vel, og nú tökum við stórt skref áfram í þessa átt. Það er ljóst að ef af kaupunum verður stækkar Icelandair Group hratt á árinu, því þetta flugfélag er hvað varðar farþegafjölda og flugflota nálægt áætlunarflugi Icelandair að stærð. Við teljum þetta góðan fjárfestingarkost fyrir Icelandair Group. Travel Service er vel rekið flugfélag og núverandi stjórnendur og eigendur munu starfa áfram með okkur sem skiptir miklu máli í svona kaupum. Félagið hefur góða og vaxandi stöðu á markaði sem verið hefur í mikilli gerjun, þ.e. leiguflugs- og lággjaldamarkaðinum í Austur-Evrópu. Einnig sjáum við töluverða samlegðarmöguleika við núverandi leiguflugsrekstur okkar. Félagið er í fjölbreyttum rekstri, í leiguflugi fyrir ýmsa aðila, í áætlunarflugi undir öflugu vörumerki, Smart Wings, og er að hasla sér völl í rekstri á einkaþotum þar sem tækifærin eru gríðarlega mikil. Þá hefur félagið kröftugar framtíðaráætlanir og á m.a. pantanir á Boeing 737-900 og Boeing 787 Dreamliner þotum”, segir Jón Karl Ólafsson. Nánari upplýsingar veita Jón Karl Ólafsson forstjóri Icelandair Group í síma: 5050371,Guðjón Arngrímsson upplýsingastjóri í síma: 864-5849 eða Sigþór Einarsson framkvæmdastjóri þróunar-og stefnumótunar í síma: 897-8363 Helstu upplýsingar: Travel Service: Leiguflugfélag með höfuðstöðvar í Prag. Er með leiguflugsstarfsemi fyrir ýmsa aðila og rekur lágfargjaldaflugfélagið Smart Wings. Floti 10-Boeing 737-800 2-Boeing 737-500 Cessna 680 Citation Sovereign (einkaþota) Forstjóri Roman Vik Vefsíða og myndir: http://www.travelservice.aero http://www.travelservice.aero/en/fleet-gallery.php Starfsmenn 550 Farþegar 2006: 1,8 milljónir Áfangastaðir Flýgur til 230 flugvalla í 4 heimsálfum Velta 2006: EUR 190 milljónir