Stilla ehf. kt. 620103-2920, félag í eigu Guðmundar Kristjánssonar og Hjálmars Kristjánssonar, hefur ákveðið að leggja fram samkeppnistilboð á grundvelli 45.gr. laga nr. 33/2003 um verðbréfaviðskipti í allt hlutafé Vinnslustöðvarinnar hf. vegna fram komins skyldutilboðs Eyjamanna ehf. kt. 480307-0700 til yfirtöku á félaginu til hluthafa í Vinnslustöðinni hf. sem kom fram þann 9. maí 2007 á grundvelli 3. gr. laga nr. 33/2003 um verðbréfaviðskipti og gildir frá 13.maí 2007 til 11. júní 2007. Félög tengd Stillu ehf. eiga nú ásamt Stillu hf. samtals 25,79 % af heildarhlutafé félagsins. Markmið Stillu ehf.er að eignast allt hlutafé félagsins. Tilboðið er gert af hálfu óstofnaðs eignarhaldsfélags í eigu Stillu ehf. Tilboðsverð verður kr. 8,5 á hvern hlut. Verð þetta er um 85 % hærra en boðið er í hvern hlut í skyldutilboði Eyjamanna ehf. sem nú er í gildi. Þetta verð er raunar það hæsta sem boðið hefur verið í hlutabréf í félaginu. Það er mat Stillu ehf. að samkeppnistilboðið endurspegli sanngjarnt raunvirði félagsins í dag þegar tekið er tillit til afkomu og eigna félagsins svo og verðlagningu sambærilegra félaga í íslenskum sjávarútvegi á undanförnum misserum. Með hliðsjón af þessu telur Stilla ehf. að tilboð Eyjamanna ehf. sé of lágt og sé fjarri því að endurspegla sanngjarnt mat á virði félagsins. Það sé raunar staðfest í viðskiptum sem hafa verið með hlutabréf í félaginu í kauphöll eftir að yfirtökuskylda myndaðist og áður en skyldutilboðið var sett fram þann 9. maí 2007 en gengi hlutabréfa í félaginu þann 8.maí 2003 var kr. 8,30 á hlut. Þess er ekki getið í skyldutilboðsyfirliti Eyjamanna ehf. og endurspeglar yfirlitið þvi ekki rétt verðmæti félagsins þegar skyldutilboðið var sett fram. Stilla ehf. fyrirhugar sömu áherslur og verið hafa í starfsemi félagsins eftir yfirtökuna. Stilla ehf. telur ákjósanlegt að reka öflugt sjávarútvegsfyrirtæki eins og Vinnslustöðina hf. í Vestmannaeyjum enda séu þar kjöraðstæður fyrir slíka starfsemi. Stilla ehf. er ósammála fyrirætlunum Eyjamanna ehf. að afskrá félagið úr OMX/ Kauphöll Íslands hf. og hyggur á áframhaldandi skráningu þess í OMX/ Kauphöll Íslands hf. sé þess kostur. Í því skyni hyggst Stilla ehf. í kjölfar yfirtökunnar selja stóran hluta hlutabréfa í félaginu til ýmissa aðila sem hafa áhuga á rekstri öflugs sjávarútvegsfyrirtækis í Vestmannaeyjum sem skráð sé í kauphöll. Telur Stilla ehf. að virk verðmyndun á markaði þjóni best hagsmunum félagsins og hluthafa þess og tryggi áframhaldandi rekstur og uppbyggingu félagsins. Takist það ekki mun félagið vera á samstæðugrundvelli talsvert skuldsett að yfirtökunni lokinni þar sem Stilla ehf. hefur í hyggju að fjármagna umtalsverðan hluta kaupverðsins með lánsfé. Getur þá komið til þess að félagið verði afskráð úr OMX/Kauphöll Íslands hf. með þeim afleiðingum að verðmyndun og viðskipti með hluti í félaginu verði fremur óvirk. Stilla ehf. óskar þess að stjórn og starfsfólk Vinnslustöðvarinnar hf. bregðist vel við þessu samkeppnistilboði og bindur vonir við að eiga gott og farsælt samstarf við allt þetta góða fólk um áframhaldandi rekstur þess um ókomin ár. Tilboð til hluthafa félagsins ásamt skilmálum verður lagt fram með formlegum hætti innan skamms í samræmi við ákvæði laga nr. 33/2003 um samkeppnistilboð. Nánari upplýsingar gefur Hróbjartur Jónatansson hæstaréttarlögmaður, Nóatúni 17, 105 Reykjavík, í síma 533 33 33 / 824 1294 og netfang hj@amp.is
- Samkeppnistilboð á grundvelli 45. gr. laga nr. 33/2003 til hluthafa í Vinnslustöðinni hf., Vestmannaeyjum
| Source: Vinnslustöðin hf.