Á 251. fundi bæjarstjórnar Sandgerðisbæjar þann 6. júní 2007 fór fram fyrri umræða um ársreikning Sandgerðisbæjar. Þann 13. júní 2007 fer seinni umræðan fram. Ársreikningur Sandgerðisbæjar er gerður í samræmi við sveitarstjórnarlög, lög um ársreikninga, reglugerð um bókhald og ársreikninga sveitarfélaga og auglýsingar fjármálaráðuneytisins um reikningsskil sveitarfélaga. Starfsemi Sandgerðisbæjar er skipt í tvo hluta. Annars vegar A hluta sem er starfsemi sem að hluta eða öllu leyti er fjármögnuð með skatttekjum og hins vegar B hluta sem eru fyrirtæki að hálfu eða meirihluta í eigu sveitarfélagsins og eru rekin sem fjárhagslega sjálfstæðar einingar. Rekstrartekjur sveitarfélagsins á árinu 2005 námu 773,4 millj. kr. en á árinu 2006 urðu þær 879,9 millj. kr. samkvæmt ársreikningi fyrirA og B hluta, en þar af námu rekstrartekjur A hluta 753,0 millj. kr. Álagningarhlutfall útsvars var 12,7% en lögbundið hámark þess er 13,03%. Rekstrarniðurstaða sveitarfélagsins, samkvæmt samanteknum ársreikningi A og B hluta, var neikvæð um 91,7 millj. kr., en rekstrarniðurstaða A hluta var neikvæð um 19,7 millj. kr. samkvæmt ársreikningi. Eigið fé sveitarfélagsins í árslok 2006 nam 400,7 millj. kr. samkvæmt efnahagsreikningi, en eigið fé A hluta 749,8 millj. kr. Laun og launatengd gjöld hjá samstæðunni voru 473,9 millj. kr. Fjöldi starfsmanna var 156 á árinu í 113 stöðugilum. Skatttekjur sveitafélagsins voru 399 þús. kr. á hvern íbúa. Á árinu 2006 var unnið byggingu stjórnsýsluhúss í samvinnu við Búmenn og fóru kaup fram á eigninni á árinu. Mikil fjölgun íbúa var í Sandgerðisbæ á síðasta ári en á árinu 2005 var hún 9.8% en er nú 8,3%.. Útlit er fyrir áframhaldandi fjölgun á árinu 2007. Mikil uppbygging er í sveitarfélaginu hjá einstaklingum og fyrirtækjum og munar þar mestu uppbygging við Flugstöð Leifs Eiríkssonar. Um 120 íbúðir eru í byggingu og eru miklar framkvæmdir við vegagerð samfara uppbyggingunni. Fyrirhuguð er viðbygging við íþróttahús og nýbygging 25m útisundlaugar á árunum 2007 og 2008. Rekstrarumhverfi Sandgerðishafnar batnar, tekjur aukast og hagrætt verður í rekstri á árunum 2007 og 2008. Höfnin er mjög skuldsett og þeim skuldum fylgir mikill fjármagnskostnaður. B hluta fyrirtækin koma mun betur út úr rekstri en áætlanir gerðu ráð fyrir.