Icelandair segir úrskurð áfrýjunarnefndar samkeppnismála alvarlegan áfellisdóm um ákvörðun Samkeppniseftirlitsins Icelandair er ósammála niðurstöðu áfrýjunarnefndar samkeppnismála í dag en telur áfangasigur að sekt Samkeppniseftirlitsins frá 30. mars var lækkuð um 30%, í 130 milljónir króna. Úrskurður áfrýjunarnefndar byggir jafnframt á öðrum forsendum en Samkeppniseftirlitið notaði, sem Icelandair telur alvarlegan áfellisdóm um ákvörðun Samkeppniseftirlitsins. Icelandair er nú að íhuga hvort úrskurður áfrýjunarnefndar verður borin undir dómstóla. Að mati Icelandair fór félagið eftir samkeppnislögum og úrskurði áfrýjunarnefndar samkeppnismála frá árinu 2003, sem staðfesti að Icelandair væri heimilt að kynna og selja Netsmelli með þeim hætti sem gert var. Þar hafi Icelandair fengið leiðbeinandi úrskurð sem félagið fylgdi í verðlagningu sinni árið 2004. Ákvarðanir í andstæða átt nú þremur árum síðar séu ekki ásættanlegar. Icelandair er eini íslenski flugrekandinn sem stundar áætlunarflug milli Íslands og annarra landa. Samkeppni í farþegaflugi til og frá landinu er hörð og Icelandair áskilur sér fullan rétt til þess að taka af krafti þátt í þeirri samkeppni neytendum til hagsbóta - í samræmi við markmið samkeppnislaga um virka samkeppni. Auk Icelandair eru nú á þessum markaði svissneska flugfélagið Hello, breska flugfélagið Astreus og danska flugfélagið Sterling, sem fljúga undir merkjum Iceland Express, skandinavíska flugfélagið SAS og breska flugfélagið British Airways. Auk þess fljúga fjölmörg erlend flugfélög leiguflug frá Íslandi fyrir innlendar ferðaskrifstofur.