• Eflir Nýherja samstæðuna sem alhliða upplýsingatæknifyrirtæki • TMS er leiðandi hýsingarfyrirtæki á Íslandi. • TMS mun starfa sem dótturfélag Nýherja. • Samanlögð árleg velta félaganna verður um 13 milljarðar. Nýherji hf. hefur samið um kaup á 77% af hlutafé í upplýsingatæknifyrirtækinu TM Software hf., TMS, af Straumi hf. FL Group hf. og Tryggingamiðstöðinni hf. Markmiðið með kaupunum er að styrkja stöðu Nýherja samstæðunnar á sviði rekstrarþjónustu, hýsingar og þróunar sérhæfðra hugbúnaðarlausna fyrir fyrirtæki. Straumur hf. annaðist milligöngu um kaupin og eru þau háð niðurstöðu áreiðanleikakönnunar sem og samþykki samkeppnisyfirvalda. TMS er móðurfélag fimm félaga: Skyggnis, Origo, Vigor, eMR og IPT. TMS er í forystu hérlendis á sviði hýsingar og sértækra hugbúnaðarlausna og eru mörg af stærstu fyrirtækjum og stofnunum landsins á meðal viðskiptavina fyrirtækisins. Tekjur TMS eru áætlaðar um 2.500 mkr á árinu og er fjöldi starfsmanna um 280. Kaup Nýherja á TMS er mikilvægur áfangi í því að styrkja stöðu Nýherja samstæðunnar sem lausna- og þjónustufyrirtækis og verður yfir helmingur tekna sameinaðs félags af hugbúnaðar- og þjónustustarfsemi. Velta samstæðunnar eftir kaupin á TMS verður um 13 milljarðar króna og starfsmannafjöldi um 750. Kaupin miðast við að heildarverð hlutabréfa í TMS sé 1.700 mkr og er greiðsla á 77% hlutafjár í TMS því ríflega 1.300 mkr. Nýherji ráðgerir að gefa út nýtt hlutafé að nafnverði 55 mkr til þess að fjármagna kaupin að hluta. Þetta hlutafé verður boðið til kaups á genginu 22 og eru því 1.210 milljónir króna fjármagnaðar með sölu hlutafjár. Greiðsla fyrir þau 77% sem keypt hafa verið er þannig að 32,35% eru greidd með hlutabréfum í Nýherja en 67,65% í peningum. Áformað er að verja allt að 25 milljónum að nafnverði hlutafjár til að greiða hluthöfum í TMS en 30 milljónir verða boðnar núverandi hluthöfum í Nýherja. Eftirstöðvar kaupverðsins verða fjármagnaðar með lánsfé og úr sjóðum félagsins. Nýherji mun bjóða öðrum hluthöfum í TMS að selja sinn hlut á sömu kjörum og þeir sem þegar hafa samið um sölu sinna hluta. Þórður Sverrisson, forstjóri Nýherja, um kaupin á TM Software: „Með kaupum á TMS býðst viðskiptavinum Nýherja samstæðunnar fullkomin heildarþjónusta fyrir sínar þarfir á sviði upplýsingatækni. Kaupin styrkja stöðu félagsins og til verður fremsta hýsingarfyrirtæki og öflugasta upplýsingatæknifyrirtæki landsins.“ Um Nýherja hf. Hlutverk Nýherja hf. er að skapa viðskiptavinum sínum virðisauka með þekkingu starfsmanna á upplýsingatækni, rekstri fyrirtækja og þörfum viðskiptavina. Nýherji býður fyrsta flokks ráðgjöf og fagþjónustu á sviði upplýsingatækni, og vandaðan hugbúnað, tölvu- og skrifstofubúnað ásamt traustri tækni- og rekstrarþjónustu. Innan Nýherja samstæðunnar verða eftir kaupin 20 félög hérlendis og erlendis, og eru um 130 starfsmenn á vegum félagsins erlendis. Hlutabréf í Nýherja eru skráð í OMX Kauphöll Íslands. Um TM Software TM Software hf. er alþjóðlegt hugbúnaðarfyrirtæki sem þjónar rúmlega 1.200 viðskiptavinum um allan heim. TM Software býður upp á heildarlausnir á sviði upplýsingatækni undir eigin vörumerkjum, sem og sölu og þjónustu á stöðluðum hugbúnaðarlausnum. Félagið var stofnað árið 1986 og gekk undir nafninu TölvuMyndir allt til ársins 2005 þegar nafninu var breytt í TM Software. Nánari upplýsingar veitir Þórður Sverrisson, forstjóri Nýherja, í síma +354 569 7711 / 354 893 3630 eða um netfangið thordur.sverrisson@nyherji.is