Rekstur tékkneska flugfélagsins Travel Service verður hluti af rekstri Icelandair Group frá og með 4. ársfjórðungi, en ekki 3. ársfjórðungi eins og gert var ráð fyrir og fram kom í tilkynningu um kaupin. Frágangur á endanlegum kaupsamningi tók lengri tíma en ætlað var, en seinkunin hefur engin áhrif á samninginn sjálfan. Þetta hefur í för með sér, að áhrif á rekstur Icelandair Group vegna yfirtöku reksturs Travel Service á árinu 2007 verða minni en ráð var fyrir gert. Áætlað er að velta félagsins á árinu 2007 verði um 62-63 milljarðar króna. Rekstrarafkoma Icelandair Group á þriðja ársfjórðungi 2007 verður undir áætlunum félagsins. Ofangreind seinkun hefur áhrif, en helstu ástæður eru að farþegatekjur í áætlunarflugi dótturfélagsins Icelandair í fjórðungnum eru lægri en áætlað var, m.a. vegna sterkrar stöðu íslensku krónunnar og lægri meðalfargjalda. Auk þess hefur viðhaldskostnaður í samstæðunni verið hærri en reiknað var með. Sterk staða íslensku krónunnar hefur einnig áhrif á útflutning frá landinu og hefur það haft áhrif á flutninga Icelandair Cargo á þessu ári og verkefnastaða í fraktleiguflugi Bláfugls var um tíma lakari en gert var ráð fyrir. Icelandair Group mun birta uppgjör fyrir þriðja ársfjórðung 2007 þann 13. nóvember nk.
- Travel Service kemur inn í rekstur Icelandair Group á fjórða ársfjórðungi 2007
| Source: Icelandair Group hf.