Fréttatilkynning Afkoma ársins 2007 25. janúar 2008 Afkoma SP-Fjármögnunar hf. árið 2007 Stjórn SP-Fjármögnunar hf. hefur staðfest ársreikning félagsins fyrir árið 2007. SP-Fjármögnun hf. er eignaleigufyrirtæki og starfar eftir lögum um fjármálafyrirtæki nr. 161/2002. Félagið er dótturfélag Landsbanka Íslands hf., sem á 51,0% hlutafjár, en aðrir hluthafar eru nokkrir sparisjóðir. Stærsti eignahluturinn er í eigu Byrs sparisjóðs sem á 34,5% en aðrir eiga minna en 10% hver. Ársreikningur SP-Fjármögnunar hf. er gerður í samræmi við alþjóðlega reikningsskilastaðla (IFRS) um árshlutareikninga. --Rekstur SP-Fjármögnunar í samræmi við áætlanir á árinu 2007-- * Hagnaður eftir skatta nam um 960 millj. kr á árinu en var 803 milljónir á árinu 2006 og er það 19,6% hækkun á milli ára. * Hreinar tekjur voru 1.999 millj. kr sem er 32% aukning frá fyrra ári. * Rekstrarkostnaður jókst um tæp 19% á milli ára, en kostnaðarhlutfallið hefur aldrei verið lægra og nam 27,4% af hreinum rekstrartekjum á árinu. --Efnahagsreikningur rúmir 49 milljarðar-- * Efnahagsreikningur félagsins stækkaði um tæplega 11 milljarða á árinu og stendur í árslok í 49,2 milljörðum. * Útlán og kröfur félagsins námu í árslok tæpum 47,7 milljörðum og hafa hækkað jafnt og þétt á undanförnum árum. * Eigið fé SP-Fjármögnunar hf. var í árslok 4.228 millj. kr. Eiginfjárhlutfall félagsins sem reiknað er samkvæmt 84. gr. laga um fjármálafyrirtæki (CAD hlutfall) er 11,3% en skv. lögum má það ekki vera lægra en 8%. --Vanskilahlutföll-- * Í árslok 2007 námu vanskil eldri en 30 daga 0,54% af heildarútlánum og höfðu hækkað úr 0,46% í ársbyrjun. * Heildarvanskil í árslok eru um 472 millj. kr. en á sama tíma nam virðisrýrnunarreikningur útlána og krafna 1,7% af heildarútlánum eða 815 millj. kr. * Endanlega töpuð útlán á árinu 2007 námu 29 millj. kr., sem jafngildir einungis 0,07% af meðalstöðu útlána ársins. Afkoma SP-Fjármögnunar hf. á árinu 2007 var mjög góð og í samræmi við áætlanir. Mikill vöxtur einkenndi starfsemi félagsins á árinu. Skipting útlána á milli atvinnugreina er vel dreifð og jöfn skipting er á milli útlána til einstaklinga og fyrirtækja. Árið 2008 hefur farið vel af stað og gera áætlanir ráð fyrir að árið í heild verði félaginu hagfellt. SP-Fjármögnun hf. hefur á að skipa reynslumiklu og hæfu starfsfólki. Eigendur eru traustir og er félagið því vel í stakk búið á komandi misserum til að takast á við þau fjölmörgu viðskiptatækifæri sem eru á markaðnum. Í stjórn SP-Fjármögnunar hf. eru Þorgeir Baldursson formaður, Elín Sigfúsdóttir, Guðmundur P. Davíðsson, Magnús Ægir Magnússon og Ragnar Z. Guðjónsson. Framkvæmdastjóri félagsins er Kjartan Georg Gunnarsson. Frekari upplýsingar veitir Pétur Gunnarsson fjármálastjóri í síma 569-2000, tölvupóstfang petur@sp.is
-Ársreikningur SP-Fjármögnunar hf. 2007-
| Source: SP-Fjármögnun hf.