Pétur J. Eiríksson mun að eigin ósk láta af starfi sínu sem framkvæmdastjóri Icelandair Cargo. Hann hefur verið framkvæmdastjóri fyrirtækisins frá stofnun þess árið 2000 en samtals í 26 ár hjá Icelandair Group og þar áður Flugleiðum. Pétur mun setjast í stjórn Icelandair Cargo. “Það hefur verið mér mikið ánægjuefni að vinna að stofnun Icelandair Cargo og eiga þátt í að byggja upp fyrirtækið og skapa því þann sess, sem það hefur öðlast í flugfutningaheiminum. Sú ákvörðun stjórnar Icelandair Group að hætta við áætlanir um kaup og leigu á Airbus A330 fraktflugvélum skapar ákveðin tímamót. Ég tel þá ákvörðun rétta frá sjónarmiði móðurfélagsins en við þau tímamót tel ég að annar eigi að taka við starfi framkvæmdastjóra og móta nýja stefnu” segir Pétur J. Eiríksson. "Ég vil fyrir hönd Icelandair Group færa Pétri J. Eiríkssyni þakkir fyrir framúrskarandi störf fyrir félagið í rúman aldarfjórðing. Pétur átti sem markaðsstjóri Flugleiða á sínum tíma stóran þátt í myndun leiðakerfis Flugleiða og þeim vexti sem orðin er í íslenskri ferðaþjónustu og hefur síðan byggt upp langstærsta flugfraktflutningafyrirtæki á Íslandi. Það er okkur mikill styrkur að Pétur hefur fallist á að taka sæti í stjórn Icelandair Cargo að loknum glæsilegum starfsferli hjá fyrirtækinu", segir Björgólfur Jóhannsson, forstjóri Icelandair Group.