Björgólfur Jóhannsson, forstjóri Icelandair Group „Uppgjör fyrstu níu mánaða ársins er betra en við gerðum ráð fyrir. Bætt afkoma skýrist einkum af auknu framboði og aukinni sölu á Norður-Atlantshafsmarkaði en jafnframt af góðri sætanýtingu og tekjustýringu í leiðakerfi Icelandair. EBITDA-hlutfall fyrirtækisins nam 29,4% á þriðja ársfjórðungi og 16,6% á fyrstu níu mánuðum ársins. Við birtingu uppgjörs vegna fyrstu sex mánaða ársins hækkaði félagið EBITDA spá ársins úr 7,6 milljörðum króna í 8,5 milljarða króna. Rekstur þriðja ársfjórðungs gekk vel og í ljósi þess hækkaði félagið EBITDA spá ársins 2010 í 9,5 milljarða króna. Rekstur samstæðunnar í október og bókunarstaða fyrir síðustu tvo mánuði ársins er með þeim hætti að félagið hefur enn hækkað EBITDA spá ársins úr 9,5 milljörðum í 10,5 milljarða. Hagnaður félagsins á þriðja ársfjórðungi nam 5,2 milljörðum króna samanborið við 4 milljarða króna á sama tímabili í fyrra. Hagnaður félagsins á fyrstu níu mánuðum ársins nam 3,2 milljörðum króna en á sama tíma í fyrra nam heildartap samstæðunnar 1 milljarði króna. Í lok september nam handbært fé félagsins 7,4 milljörðum króna. Þrátt fyrir góða afkomu á fyrstu níu mánuðum ársins liggur fyrir að framundan eru tveir krefjandi ársfjórðungar. Áframhaldandi óvissa í íslensku efnahagslífi er fyrirtækinu kostnaðarsöm og á næsta ári eru líkur á að samkeppni í millilandaflugi til og frá Íslandi harðni umtalsvert .Jafnframt má búast við auknu framboði yfir Atlantshafið en við teljum fyrirtækið vel í stakk búið til að mæta þeirri samkeppni með aukinni þjónustu, hagkvæmri verðlagningu og stöðugu sætaframboði til og frá landinu. Eins og tilkynnt var þann 21. október síðastliðinn er fjárhagslegri endurskipulagningu Icelandair Group lokið. Vaxtaberandi skuldir lækka um tæpa 14 milljarða króna og eru um 25 milljarðar króna eftir endurskipulagninguna. Samhliða hefur hlutafé félagsins hækkað eftir greiðslu reiðufjár frá fjárfestum sem skráðu sig fyrir 5,5 milljörðum króna að markaðsverði í nýju hlutafé. Einnig hafa stærstu lánveitendur Icelandair Group breytt skuldum að fjárhæð 3,6 milljörðum króna í hlutafé miðað við gengið 5, þannig að þeir munu skrá sig fyrir 720 milljón nýjum hlutum. Heildarhlutafjárhækkun mun þannig nema um 2,9 milljörðum nýrra hluta að nafnvirði. Ég er mjög ánægður með þær breytingar sem félagið hefur gengið í gegnum á þessu ári. Að lokinni fjárhagslegu endurskipulagningunni stendur efnahagur og rekstur Icelandair Group traustum fótum. Á þeim trausta grunni munum við halda áfram að auka ferðamannastraum til Íslands á vorin og haustin - sem er stærsta kappsmál allra hagsmunaaðila í ferðaþjónustu. Endurbættur efnahagur mun gera okkur kleift að vaxa innanfrá. Icelandair Group stóð af sér kostnaðarsamt eldgos fyrr á árinu og efnahagslægð sem hófst á árinu 2008 hefur verið félaginu mjög kostnaðarsöm. Uppgjör fyrstu níu mánaða ársins gefur okkur ástæðu til að vera bjartsýn á framtíðina.“ Afkoma á þriðja ársfjórðungi 2010 + EBITDA var 9,1 milljarðar króna en var 6,9 milljarðar króna á sama tíma í fyrra + EBIT var 7,5 milljarðar króna en var 5,4 milljarðar króna á sama tíma í fyrra. Afskriftir voru 1,6 milljarðar króna en voru 1,5 milljarðar króna á sama tíma í fyrra + Heildarvelta Icelandair Group var 31,1 milljarðar króna og jókst um 8,9% frá sama tíma í fyrra + Fjármagnskostnaður var 1,2 milljarðar króna samanborið við 1,4 milljarða króna árið áður + Hagnaður eftir skatta var 5,2 milljarðar króna en hagnaður var 4,0 milljarðar króna á sama tíma í fyrra Afkoma á fyrstu níu mánuðum 2010 + EBITDA var 11,5 milljarðar króna en var 8,4 milljarðar króna á sama tíma í fyrra + EBIT var 7,2 milljarðar króna en var 4,4 milljarðar króna á sama tíma í fyrra. Afskriftir voru 4,2 milljarðar króna en voru 3,9 milljarðar króna á sama tíma í fyrra. + Fjármagnskostnaður var 3,0 milljarðar króna samanborið við 3,1 milljarð króna árið áður + Hagnaður eftir skatta var 3,2 milljarðar króna en tap var 1,0 milljarður króna á sama tíma í fyrra + Handbært fé í lok ársfjórðungsins var 7,4 milljarðar króna, en var 1,9 í árslok 2009 + Eiginfjárhlutfall var 18,6 % í lok september 2010, en var 16,4% í lok ársins 2009 + Eignir voru 91,2 milljarðar króna í lok september 2010 samanborið við 89,1 milljarð króna í árslok 2009