Reykjavík 7. desember 2010 Stjórn Icelandair Group hf. (“Félagið”) kt. 631205-1780 tilkynnti um hlutafjárútboð í félaginu þann 17. nóvember 2010. Alls verða boðnir til kaups á bilinu 500 til 1.059 milljónir nýir hlutir í almennu hlutafjárútboði (“Útboðið”) með útgáfu nýrra hlutabréfa (“Nýir hlutir”) í félaginu. Ef Félaginu berast áskriftir í færri en 500 milljónir hluta munu engir Nýir hlutir verða boðnir til kaups. Útboðið hefst miðvikudaginn 8. desember 2010 klukkan 10.00 og lýkur fimmtudaginn 23. desember 2010 klukkan 16.00. Félagið mun birta Lýsingu 7. desember vegna Útboðsins. Lýsingin samanstendur af útgefandalýsingu dagsettri 28. október 2010, ásamt samantekt og verðbréfalýsingu dagsettum 7. desember 2010. Hægt er að nálgast Lýsinguna á heimasíðu Félagsins, www.icelandairgroup.is, en prentuð eintök verða einnig aðgengileg á aðalskrifstofu félagsins á Reykjarvíkurflugvelli, 101 Reykjavík, í 12 mánuði frá birtingardegi. Stjórn félagsins hefur nú gengið frá skilmálum útboðsins. Útboðsgengið verður 2,5 kr. á hvern Nýjan hlut. Einungis er hægt að greiða fyrir Nýja hluti með reiðufé í íslenskum krónum. Allir Nýir hlutir eru í sama flokki. Hlutirnir gefa allir sömu réttindi og eru sambærilegir við eldri hluti að öllu leyti. Nýjum hlutum í félaginu verður úthlutað á eftirfarandi hátt: 1.Núverandi hluthafar félagsins úr hluthafaskrá 17. nóvember 2010 skv. Verðbréfaskráningu Íslands hafa forkaupsrétt að 799 milljón Nýjum hlutum í útboðinu. Þau hlutabréf sem voru keypt eftir 15. nóvember njóta ekki forgangsréttar. Ef forgangsréttur hluthafa verður ekki nýttur að fullu verða hlutirnir boðnir almennum fjárfestum. Hluthafar skulu fylla út rafrænt skráningareyðublað á heimasíðu Íslandsbanka, www.isb.is. Öllum hluthöfum verður sendur póstur 7. desember 2010 með upplýsingum um nafnverð og gengi þeirra hluta er hluthafi á rétt til að kaupa, um frest til áskriftar og um greiðslukjör. Hluthöfum var jafnframt sent notandanafn og lykilorð að rafrænu skráningareyðublaði á heimasíðu Íslandsbanka. Ef hluthafi sem óskar eftir þátttöku hefur ekki fengið úthlutað notandanafni og lykilorði getur sá hinn sami haft samband við Íslandsbanka í síma +354 440 4920. Nýjum hlutum verður úthlutað samkvæmt lögum um hlutafélög nr. 2/1995 og samþykktum Félagsins. Ef hluthafi nýtir ekki forgangsrétt sinn til fullnustu verður öðrum forgangsréttarhöfum boðið að auka við hlut sinn í útboðinu. Hluthafar sem vilja nýta sér forgangsrétt hluthafa sem ekki taka þátt í útboðinu geta skráð sig fyrir fleiri hlutum en forgangsréttur viðkomandi hluthafa segir til um. Umframhlutum verður svo úthlutað hlutfallslega eftir skráðri hlutafjáreign þann 17. nóvember 2010 hjá Verðbréfaskráningu Íslands. Ef fjöldi nýrra hluta gengur ekki upp í heila tölu verður námundað niður á við. 2.Allir starfsmenn félagsins ásamt dótturfélögum þess, að undanskildum Bluebird Cargo ehf. og SmartLynx AOC, sem voru starfandi hjá félaginu þann 31. október 2010 hafa forgang á 160 milljón nýjum hlutum í útboðinu. Ef starfsmenn skrá sig ekki fyrir þeim hlutum verða þeir boðnir almennum fjárfestum. Starfsmenn félagsins geta fundið tengil á rafrænt skráningareyðublað hjá Íslandsbanka á innraneti félagsins (Mywork). Starfsmenn sem nýta sér tengil af innraneti félagsins fá sjálfkrafa auðkenni á skráningareyðublaði. 3.Almennum fjárfestum á Íslandi verður boðið að kaupa 100 milljón nýja hluti í félaginu ásamt óseldum hlutum frá forgangsréttarhöfum og starfsmönnum. Þátttaka í útboðinu er heimil öllum íslenskum einstaklingum og lögaðilum sem lögum samkvæmt er heimil þátttaka í hlutafjárútboðum. Starfsmönnum Íslandsbanka er heimillt að taka þátt í almenna hluta útboðsins en þátttaka þeirra takmarkast við fyrstu þrjá tíma skráningar þann 8. desember 2010. Fjárfestar skulu skrá sig fyrir nýjum hlutum í félaginu á rafrænu skráningareyðublaði á heimasíðu Íslandsbanka, www.isb.is/Icelandair. Ákvörðum um úthlutun á nýjum hlutum til starfsmanna og almennra fjárfesta verður tekin af stjórn félagins að útboðstímanum loknum. Stjórn félagins áskilur sér rétt til þess að hafna öllum áskriftum, að hluta eða öllu leyti. Niðurstaða útboðsins verður tilkynnt þann 30. desember 2010. Tilkynningin mun innihalda heildarfjölda nýrra hluta, fjölda þátttakenda, fjölda áskrifta í einstökum liðum útboðsins ásamt ákvörðun stjórnar félagsins um úthlutun nýrra hluta. Greiðsluseðill verður sendur í heimabanka þátttakenda þann 30. desember 2010. Þátttakendur geta einnig valið að fá sendan greiðsluseðil á heimilisfang sitt ef þeir merkja sérstaklega við þann valkost á skráningareyðublaðinu. Þeir þátttakendur sem ekki fá greiðsluseðil munu ekki fá úthlutað nýjum hlutum í félaginu. Engar frekar tilkynningar verða sendar varðandi úthlutun nýrra hluta. Áætlað er að Nýju hlutirnir verða teknir til viðskipta á Aðalmarkaði NASDAQ OMX Ísland í síðasta lagi 11. janúar 2011. Gjalddagi útsendra greiðsluseðla er 6. janúar 2010. Stjórn félagins getur ákveðið að innheimta greiðsluseðlana samkvæmt lögum um vexti og verðtryggingu nr. 38/2001 eða fellt niður áskrift ógreiddra hluta og úthlutað þeim til þriðja aðila án tilkynningar til þátttakanda.