Tekjur ársins 2012 námu 714,0 milljónum evra, sem er 6,8% aukning samanborið við tekjur árið áður [2011: 668,4 milljónir evra].
- EBITDA var 86,0 milljónir evra, sem er 12,0% af tekjum samborið við 87,0 milljónir evra árið 2011 [2011: 98,0 milljónir evra, leiðrétt].[1]
- Rekstrarhagnaður (EBIT) var 61,1 milljón evra, sem er 8,6% af tekjum samborið við 62,2 milljónir evra árið 2011 [2011: 73,2 milljónir evra, leiðrétt].[2]
- Hagnaður ársins 2012 nam 35,6 milljónum evra [2011: 34,5 milljónir evra]. Hagnaður per hlut nam 4,88 evru sentum [2011: 4,70 evru sent á hlut].
- Sjóðstreymi er traust og nettó vaxtaberandi skuldir í lok árs námu 243,2milljónum evra [2011: 250,5 milljónir evra].
- Pantanabók stóð í 125,4 milljónum evra í árslok 2012 [2011: 188,9 milljónir evra].
Góður vöxtur upp á 6.8% á síðasta ári byggir á styrkleikum Marel, samþættingu síðustu missera og þéttu sölu- og þjónustuneti um allan heim. Innri vöxtur í kjarnastarfsemi Marel á síðustu fjórum árum var 29% við krefjandi markaðsaðstæður.
Tekjur ársins eru í samræmi við væntingar félagsins með 8,6% rekstarhagnað sem þó er undir 10-12% langtíma markmiði félagsins. Markaðir í Evrópu og Bandaríkjunum voru krefjandi þar sem tafir voru á pöntunum á stöðluðum vörum sem gefa háa framlegð en á móti óx sala á stærri vinnslukerfum á nýmörkuðum áfram. Þess er vænst að stærri verkefnin skili framtíðartekjum af stöðluðum vörum og tengdri þjónustu .
Theo Hoen, forstjóri:
„Heilbrigður 6,8% vöxtur er afrek við krefjandi markaðsaðstæður. Marel hefur vaxið gríðarlega á síðustu fjórum árum. Við bjóðum stöðugt upp á nýjar vörur og höfum styrkt okkar alþjóðlega sölu- og þjónustunet á sama tíma og við höfum skapað eina heild með samþættingu margra félaga.
Á síðasta ári var mikill vöxtur í fiskiðnaði hjá okkur og við sáum batamerki í kjötiðnaði á síðasta ársfjórðungi. Við höldum stöðu okkar sem markaðsleiðtogi í frekari vinnslu. Kjúklingamarkaðurinn er áfram meginstoðin í tekjuöflun Marel og afkoman þar er umfram væntingar.
Við gerum ráð fyrir hóflegum vexti á fyrri helmingi ársins 2013 en jafnframt að okkar helstu markaðir muni rétta úr kútnum á seinni hluta ársins, sérstaklega Bandaríkin sem hafa verið í lægð síðustu tvö árin. Við munum leggja áherslu á kostnaðaraðhald og stöðlun vara til að auka arðsemina. Ef við horfum til lengri tíma þá er okkar trú að stöðugt framboð af nýjum vörum, stöðluðum lausnum og þjónustu á öllum mörkuðum muni skila sterkum innri vexti á næstu árum. Með aukinni sölu á stöðluðum vörum og áherslu á hagkvæmni í rekstrinum gerum við ráð fyrir að ná 10-12% EBIT markmiði á seinni hluta ársins. ”
Tekjudreifing Marel er áfram sterk. Almennt skiptast tekjurnar nokkuð jafnt í þrennt: 1) stór vinnslukerfi, oft í nýjar verksmiðjur; 2) staðlaður tækjabúnaður og minni vinnslukerfi; og 3) varahlutir og þjónusta. Á síðasta ári var dreifingin hins vegar þannig að stór vinnslukerfi skiluðu um 40% tekna á meðan staðlaðar vörur mynduðu minna en 25% teknanna, sem er lægri hlutdeild en undanfarin tvö ár og því er framlegð ársins 2012 minni en áður. Meira en helmingur tekna Marel stafar frá kjúklingageiranum, en þess eru skýr merki að aðrir markaðir geti vaxið hraðar í framtíðinni.
Á aðalfundi ársins 2013, sem haldinn verður 6. mars næstkomandi, mun stjórn Marel leggja til að hluthafar fái greidd 0,97 evru sent í arð á hlut fyrir rekstrarárið 2012 [2011: 0,95 evru sent á hlut]. Miðað við fjölda útistandandi hluta nú nemur fyrirhuguð heildararðgreiðsla um 7,1 milljón evra, sem samsvarar um 20% af hagnaði ársins. Arðgreiðslutillaga þessi er í samræmi við markmið um fjármagnsskipan og arðgreiðslustefnu sem kynnt var á aðalfundi félagsins 2011.
Verði tillagan samþykkt af hluthöfum félagsins, munu hlutabréf sem skipta um hendur frá og með 7. mars 2013 (e. ex-date = arðleysisdagur) verða án arðsréttinda og réttur hluthafa til arðgreiðslu verða miðaður við hlutaskrá félagsins í lok viðskipta hinn 11. mars 2013 sem yrði arðsréttindadagur (e. record date). Stjórn Marel leggur til að arður verði greiddur út hinn 5. apríl 2013 (e. payment date).
Afkoma fjórða ársfjórðungs 2012
Góðar tekjur en lægri arðsemi
- Tekjur á fjórða ársfjórðungi 2012 námu 178,4 milljónum evra, sem er 3% samdráttur samanborið við sama tímabil fyrir ári [Q4 2011: 183,9 milljónir evra].
- EBITDA var 19,5milljónir evra, sem er 10,9% af tekjum [Q4 2011: 27,9 milljónir evra].
- Rekstrarhagnaður (EBIT) var 13,6 milljónir evra, sem er 7,6% of tekjum [Q4 2011: 21,6 milljónir evra].
- Hagnaður nam 7,1 milljón evra á fjórða ársfjórðungi 2012 [Q4 2011: 15,0 milljónir evra].
- Handbært fé frá rekstri, fyrir fjármagnsliði og skatta, er áfram traust og nam 28,6 milljónum evra samanborið við 19,9 milljónir á fjórða ársfjórðungi 2011.
Sterk markaðsstaða Marel og stöðugt framboð nýrra vara er undirstaða góðrar tekjuöflunar Marel við krefjandi markaðsaðstæður á árinu 2012. Nýjar pantanir námu 152,3 milljónum evra á fjórða ársfjórðungi [Q4 2011: 176,0 milljónir evra] sem er aukning frá þriðja ársfjórðungi 2012. Virði pantana nam 125,4 milljónum evra í lok ársins samanborið við 188.9 milljónir evra í lok fyrra árs.
Í desember 2012 gerði Marel samkomulag um breytta skilmála á langtímafjármögnun félagsins frá nóvember 2010, sem fól í sér framlengingu á fjármögnun um eitt ár eða til ársins 2016. Þrátt fyrir erfiðar aðstæður á fjármálamörkuðum náðist þessi mikilvægi áfangi sem mun leiða til hagkvæmari fjármögnunar og lægri fjármagnskostnaðar.
Kynningarfundur 6. febrúar 2013
Marel boðar til kynningarfundar um afkomu félagsins miðvikudaginn 6. febrúar kl. 8:30 í húsnæði félagsins að Austurhrauni 9, Garðabæ. Fundinum verður einnig netvarpað: www.marel.com/webcast.
Sjá fréttatilkynningu í fullri lengd í meðfylgjandi pdf-viðhengi.
[1] Án einskiptiskostnaðar vegna samninga um nýtt fyrirkomulag lífeyrissjóðsmála sem nam 11 milljónum evra.
[2] Sjá neðanmálsgrein 1.
