Hinn 1. janúar 2014 mun Ásgeir Margeirsson taka við starfi forstjóra HS Orku hf. Júlíus Jónsson hefur gegnt starfi forstjóra fyrirtækisins og forverans, Hitaveitu Suðurnesja hf, frá 1992 og starfi fjármálastjóra Hitaveitu Suðurnesja frá 1982.
Júlíus hefur í þennan langa tíma lagt gríðarlega mikilvægt framlag til uppbyggingar fyrirtækjanna. HS Orka hf. þakkar honum fyrir hans frábæra starf og ósérhlífni og hlakkar til samstarfs við hann í hlutverki hans hjá HS Veitum.
Ásgeir Margeirsson hefur setið í stjórn HS Orku og Hitaveitu Suðurnesja frá 2007 og verið stjórnarformaður HS Orku frá 2010. Ásgeir er 52 ára, menntaður byggingarverkfræðingur frá Háskóla Íslands og Tækniháskólanum í Lundi í Svíþjóð. Ásgeir hefur starfaði í orkuiðnaði í yfir 20 ár og komið að fjölmörgum verkefnum á Íslandi og erlendis. HS Orka hf. býður Ásgeir velkominn til starfa og hlakkar til samstarfs við hann og framlag hans til fyrirtækisins og starfsmanna þess. Ásgeir er kvæntur Sveinbjörgu Einarsdóttur, hjúkrunarfræðingi og eiga þau þrjá syni á þrítugsaldri.
Reykjanesbæ, 6. desember 2013