Áfrýjunarnefnd samkeppnismála birti fyrr í dag úrskurð sinn þar sem ákvörðun Samkeppniseftirlitsins nr. 25/2020 er felld úr gildi að hluta og sektargreiðsla Símans lækkuð úr 500 m.kr. í 200 m.kr.
Síminn fagnar því að stjórnvaldssekt sú er Símanum var gert að greiða sé lækkuð umtalsvert. Það sýnir að hið meinta brot á skilyrðum sem Símanum voru sett á fyrri árum var ekki með þeim hætti er Samkeppniseftirlitið úrskurðaði um.
Taldi áfrýjunarnefndin að Samkeppniseftirlitið hefði ekki rannsakað málið með fullnægjandi hætti og tók þar með undir sjónarmið Símans hvað varðar ætlað brot á 19. og 20. gr. ákvörðunar Samkeppniseftirlitsins nr. 6/2015. Áfrýjunarnefndin staðfesti ætlað brot gegn 3. gr. ákvörðunar nr. 20/2015 sem er Símanum mikil vonbrigði.
Verð á áskrift að ensku úrvalsdeildinni í knattspyrnu hefur lækkað eftir að Síminn tók við sýningarréttinum og aldrei hefur verið sýnt frá fleiri leikjum í beinni útsendingu. Fjöldi viðskiptavina með aðgang að efninu hefur aldrei verið meiri enda þjónustan hóflega verðlögð og aðgengileg öllum, óháð fjarskiptafélagi.
Síminn mun nú fara betur yfir forsendur úrskurðarins og meta næstu skref, t.d. hvort eftirstandandi þáttur verði borinn undir dómstóla.
Þessi úrskurður áfrýjunarnefndar samkeppnismála mun hafa áhrif á afkomu Símans árið 2020 þar sem lækkun sektar verður færð á síðasta fjórðung ársins. Áður birt EBITDA spá Símans fyrir árið 2020 var 9,9 – 10,3 milljarðar. Vinnu við ársuppgjör er ekki lokið, en samkvæmt fyrstu drögum er útlit fyrir að EBITDA ársins verði í kringum 10,4 – 10,5 milljarða króna að teknu tilliti til úrskurðar áfrýjunarnefndar. Sá fyrirvari er gerður að endurskoðun ársuppgjörs er í gangi og stjórn félagsins hefur ekki fjallað um niðurstöðu ársins.
Nánari upplýsingar veita:
Orri Hauksson, forstjóri Símans, (orri@siminn.is) eða sími 550 6003.
Guðmundur Jóhannsson, samskiptafulltrúi Símans, (gudmundurjoh@siminn.is) eða sími 895 1977.