Norræni fjárfestingarbankinn (NIB) hefur undirritað 7 ára lánasamning við Ljósleiðarann ehf. til að styðja við fjárfestingar í ljósleiðarakerfinu á Íslandi á árunum 2024–2026.
Lánið, sem nemur 4 milljörðum króna, er veitt til samfjármögnunar á mikilvægum uppbyggingarverkefnum Ljósleiðarans. Fjármagnið mun renna í áframhaldandi uppbyggingu ljósleiðarakerfisins, þar á meðal ljósleiðaratenginga við heimili og fyrirtæki, þróun net- og flutningskerfa sem styðja við örugga og skilvirka gagnaflutninga, auk styrkingar á kerfinu.
Fjármögnunin er hluti af nýlegri skuldabréfaútgáfu NIB í íslenskum krónum.
Mikilvægt skref í áframhaldandi vexti
Ljósleiðarinn er leiðandi fyrirtæki í uppbyggingu stafrænna innviða á Íslandi og starfar nú á öllum helstu þéttbýlisstöðum landsins. Fyrirtækið tengir árlega þúsundir nýrra heimila og vinnur með sveitarfélögum að þróunarverkefnum sem styðja við þéttbýlisvöxt og stafræna framtíð landsins.
Auk þess gegnir Ljósleiðarinn lykilhlutverki í alþjóðlegri tengingu Íslands við umheiminn með rekstri á internetsamböndum til Evrópulanda.
Allar framkvæmdir Ljósleiðarans byggja á ábyrgum vinnubrögðum með sjálfbærni að leiðarljósi. Nýjar tengingar eru lagðar meðfram núverandi flutningsleiðum og byggðum svæðum, sem lágmarkar umhverfisáhrif framkvæmda.
Viðurkenning á mikilvægi fjárfestingarinnar
Forstjóri NIB, André Küüsvek, segir fjármögnun Ljósleiðarans styðja við markmið bankans um framleiðniaukningu og sjálfbærni á Norðurlöndum og í Eystrasaltsríkjunum.
„Það er okkur sönn ánægja að styðja við þessar mikilvægu fjárfestingar í stafrænum innviðum á Íslandi. Sterkir fjarskiptainnviðir eru forsenda hagvaxtar og nýsköpunar, og verkefnið fellur vel að áherslum NIB um sjálfbærni og tæknilega framþróun.“
Einar Þórarinsson, framkvæmdastjóri Ljósleiðarans, fagnar samkomulaginu og telur það styrkja félagið til framtíðar:
„Það skiptir miklu máli að Ljósleiðarinn vinni með öflugum og traustum aðila þegar kemur að fjármögnun. Með þessum samningi við NIB tryggjum við áframhaldandi vöxt fyrirtækisins og getum haldið áfram að byggja upp trausta og örugga innviði fyrir fólkið í landinu bæði þegar kemur að atvinnurekstri og hinu daglega lífi.“
Um aðilana
Ljósleiðarinn ehf. er í fullri eigu Orkuveitunnar, sem er viðskiptavinur NIB. Orkuveitan er opinbert félag í eigu Reykjavíkurborgar (93,5%), Akraneskaupstaðar (5,5%) og Borgarbyggðar (1%).
Norræni fjárfestingarbankinn (NIB) er alþjóðleg fjármálastofnun í eigu átta aðildarríkja: Danmerkur, Eistlands, Finnlands, Íslands, Lettlands, Litháens, Noregs og Svíþjóðar. Bankinn veitir fjármögnun til einkageirans og opinberra aðila í og utan aðildarríkjanna. NIB hefur hæstu mögulegu lánshæfiseinkunnir, AAA/Aaa, frá matsfyrirtækjunum S&P Global Ratings og Moody’s.
Nánari upplýsingar:
Breki Logason,
Samskiptastjóri Orkuveitunnar
breki.logason@orkuveitan.is
