Stjórn Ljósleiðarans ehf. samþykkti ársreikning félagsins fyrir árið 2024 á fundi sínum í dag. Í niðurstöðum kemur fram að rekstrartekjur jukust í um 5,67 milljarða króna og rekstrarhagnaður (EBITDA) hækkaði milli ára, sem endurspeglar aukna innri styrkingu og vaxandi eftirspurn eftir öflugum ljósleiðaratengingum. Eigið fé í lok árs nam 14,55 milljörðum króna, sem gefur 36,2% eiginfjárhlutfall.
„Árið 2024 var mikilvægur áfangi fyrir Ljósleiðarann. Við vorum ákveðin í að byggja enn frekar upp okkar öflugu fjarskiptainnviði, og sú vinna er nú þegar farin að skila sér í sterkari stöðu og auknum tekjum. Við sjáum sem dæmi aukinn rekstrarhagnað frá fyrra ári upp á 300 milljónir króna. Við hjá Ljósleiðaranum viljum vera leiðandi afl þegar kemur að fjarskiptum hér á landi,“ segir Einar Þórarinsson, framkvæmdastjóri Ljósleiðarans.
Aukin innri styrkur þrátt fyrir tap
Nettótap ársins var 731 milljón króna, samanborið við 570 milljónir króna árið áður. Þrátt fyrir þessa aukningu, sem má einkum rekja til umfangsmikillar uppbyggingar og hærri fjármagnskostnaðar, jókst rekstrarhagnaður fyrir afskriftir (EBITDA) á milli ára og nam 3,0 milljörðum króna (2023: 2,7 milljarðar króna). Veltufé frá rekstri er einnig að aukast sem endurspeglar traustan rekstrargrunn félagsins og aukið sjóðstreymi.
„Það er mikilvægt að hafa í huga að félagið hefur aldrei verið sterkara að innan en nú, enda hafa framkvæmdir og fjárfestingar lagt grunn að öruggari og hraðvirkari tengingum fyrir landsmenn. Við sjáum mjög jákvæð merki um að þessi varfærna en kraftmikla nálgun muni skila arðbærum rekstri til lengri tíma,“ bætir Einar við.
Ný fjármögnun eykur sveigjanleika
Líkt og fram kom á dögunum hefur Ljósleiðarinn tryggt sér hagstæða lánsfjármögnun, m.a. frá Norræna fjárfestingarbankanum, að upphæð 4 milljarðar króna til sjö ára. Slík endurskipulagning styrkir fjármagnsskipan Ljósleiðarans og stuðlar að lægri fjármagnskostnaði.
„Með þessum lánasamningi eflum við rekstrarlegan styrk og leggjum grunn að enn hraðari vexti. Með öflugum innviðum, TíuGíg-tækninni og hagkvæmari fjármögnun erum við sannfærð um að festa okkur enn frekar í sessi sem burðarás á íslenskum fjarskiptamarkaði,“ segir Einar.
Fjölgun tenginga og sífellt betri þjónusta
Á árinu 2024 var lögð sérstök áhersla á viðhald og uppfærslur á grunnkerfinu, m.a. samkeyrslu innviða frá Sýn, auk þess sem sífellt fleiri sveitarfélög og hverfi bættust í hóp tenginga. Eftirspurn eftir háhraða nettengingum, bæði fyrir heimili og fyrirtæki, hefur aldrei verið meiri og leggur Ljósleiðarinn áfram áherslu á að efla fjarskiptakerfi sín, með aukinni afkastagetu og bættri upplifun fyrir notendur.
„Við sjáum skýrt að viðskiptavinir treysta á stöðugleika og gæði þjónustunnar. Með því að halda áfram að þróa þjónustu okkar og innleiða nýjustu tæknilausnir getum við einbeitt okkur að því að veita landsmönnum allt sem þeir þurfa til stafræns lífs og framtíðar,“ segir Einar.
Þá segir Einar að áhugi fjárfesta á félaginu hafi verið mikill en að svo stöddu sé ekki gert ráð fyrir sölu hlutafjár.
„Við höfum valið að hagræða í rekstrinum og fjármagna framkvæmdir með skilvirkari hætti. Ef réttar aðstæður skapast í framtíðinni, erum við reiðubúin að skoða sölu hlutafjár eða aðrar leiðir til að styrkja félagið enn frekar,“ segir Einar.
Björt framtíðarsýn
Jákvæð þróun í rekstrarhagnaði, veltufé og fjölda tenginga gefur Ljósleiðaranum mikið svigrúm til að auka þjónustu og sækja enn frekar fram. Liður í þeirri vegferð er styrking fjarskiptaöryggis um land allt og áhersla á öflug samskipti við sveitarfélög og fjarskiptafyrirtæki.
„Ég er sannfærður um að Ljósleiðarinn haldi áfram að setja mark sitt á innviði landsins. Við viljum vera best í okkar geira, og til þess höfum við nú þegar gríðarlega góðan grunn. Komandi mánuðir verða spennandi, og ég er fullviss um að við höfum réttan mannskap, tæknina og fjármögnun til að halda áfram að gera góða hluti fyrir bæði landsmenn og atvinnulífið,” segir Einar að lokum.
Nánari upplýsingar veita
• Einar Þórarinsson, framkvæmdastjóri Ljósleiðarans, netfang: einar@ljosleidarinn.is
• Upplýsingar um Ljósleiðarann og þjónustu félagsins: www.ljosleidarinn.is
Viðhengi
