Tilkynning til kauphallar vegna útgáfu nýs skuldabréfaflokks til fjármögnunar á nýju láni til Búseta hsf.
Í tengslum við lánveitingu til Búseta hsf. hefur fagfjárfestasjóðurinn Landsbréf – BÚS I lokið sölu á fyrstu útgáfu nýs skuldabréfaflokks með auðkennið BUS 63. Skuldabréf voru seld að nafnvirði kr. 1.620.000.000 á ávöxtunarkröfunni 3,15%. Heildarheimild útgáfu er kr. 12.000.000.000. Skuldabréfaflokkurinn er verðtryggður á 3,15% föstum vöxtum, til 40 ára og með jöfnum greiðslum vaxta og höfuðstóls. Lokagjalddagi er þann 5. febrúar 2063. Vaxta- og höfuðstólsgreiðslur greiðast mánaðarlega, í fyrsta skipti 6. mars 2023. Skuldabréf í flokknum eru fyrst uppgreiðanleg 5. febrúar 2031 með 1,5% uppgreiðslugjaldi sem stiglækkar og fellur niður 14 árum frá útgáfudegi.
Fyrirhugað er að sækja um töku nýja skuldabréfaflokksins til viðskipta í kauphöll. Yfirlýst markmið og skilmáli skuldabréfanna er að skuldabréfaflokkurinn verði tekinn til viðskipta í kauphöll fyrir árslok 2023.
Skuldabréfaútgáfur Landsbréfa – BÚS I fela ekki í sér bein veð en allar eignir fagfjárfestasjóðsins Landsbréf- BÚS I standa til tryggingar á greiðslu skuldabréfanna samkvæmt almennum reglum kröfuréttar.
Ætlunin er að afrakstur sölu skuldabréfanna fari til nýrrar lánveitingar Landsbréfa – BÚS I til Búseta hsf. Miðað er við að það lán verði tryggt með um 40 íbúðareignum Búseta hsf. í póstnúmeri 110 í Reykjavík. Lánshlutfall eigna sjóðsins miðað við uppreiknað fasteignamat og stöðu lána um síðustu áramót var 52,0%. Með nýrri lánveitingu og miðað við verðmat nýs veðandlags má reikna með að lánshlutfallið í heild verði nærri 53,2%.
Skjöl sem tengjast skuldabréfaflokknum BUS 56 og BUS 60 má nálgast á vefsíðunni:
https://landsbref.is/skrad-skuldabref
Nánari upplýsingar veitir Ingvar Karlsson, sjóðstjóri í síma 410 2500.
