Eftirfarandi tilkynning birtist í kauphöllinni í London, London Stock Exchange: Sameiginlegt félag í eigu Exista hf. og Chris Ronnie hefur keypt 29% hlut í JJB Sports plc. („JJB“), breskri verslunarkeðju með ýmiskonar íþróttavarning og tengdar vörur, fyrir 275 penní á hlut eða sem nemur samtals 190 milljónum sterlingspunda (24 milljörðum króna). Eigið fé sameiginlegs félags er að jöfnu í eigu Exista og Chris Ronnie. Seljandi þessa 29% hlutar er Whelan fjölskyldan, sem byggt hefur félagið upp á undanförnum áratugum. Chris Ronnie mun taka við stöðu aðstoðarforstjóra JJB Sports. Chris hefur starfað um 25 ára skeið í alþjóðlegum íþrótta- og sportvörugeira, meðal annars hjá Sports Division, JJB Sports Plc., Umbro International Limited og SportsWorld International Limited. Chris Ronnie: „Mér er það mikil ánægja að taka sæti í stjórn JJB, fyrirtæki sem ég tel að eigi afar bjarta framtíð. David Whelan og fjölskylda á heiður skylinn fyrir árangur fyrirtækisins og að koma því í þá leiðandi stöðu sem það er nú. Auk þess hlakka ég til að starfa með Exista, sem og Kaupthing Singer & Friedlander sem kom viðskiptunum á og annast fjármögnun.“ Lýður Guðmundsson, stjórnarformaður Exista: „Fjárfesting í JJB samræmist fjárfestingastefnu okkar og uppfyllir þau skilyrði sem við setjum um gott fjárstreymi og traust viðskiptalíkan, þar sem unnt er að leysa úr læðingi enn frekari verðmæti í samvinnu við öfluga stjórnendur.“ Frekari upplýsingar veita: Chris Ronnie Sími:+44 (0)7786 910240 Sigurður Nordal framkvæmdastjóri samskiptasviðs Exista Sími:+354 550 8620 Um JJB Sports plc. JJB Sports, sem er leiðandi verslunarkeðja með íþróttavörur á Bretlandseyjum, var stofnuð árið 1971 við kaup á íþróttavöruverslun í Wigan. Upphaflega verslunin var stofnuð af JJ Broughton snemma á 19. öld, en þegar David Whelan, stofnandi félagsins í núverandi mynd, keypti verslunina hélt hann nafninu JJB. Árið 1994 var félagið skráð í kauphöllina í London og hafði þá stækkað úr 4 verlsunum árið 1976 í 120 verslanir árið 1994. Árið 1998 keypti JJB Sports stærsta keppinaut sinn, Sports Division, sem varð til þess að félagið varð stærsta verslunarkeðja með íþróttavörur í Bretlandi. Frá þeim tíma hefur Sports Divsion verið að fullu sameinuð JJB og í dag rekur félagið 410 verslanir í öllum helstu bæjum og borgum Bretlands, ásamt verslunum á Írlandi. Markmið JJB er að bjóða upp á úrval vandaðra merkjavara fyrir íþróttir og útivist. Jafnframt starfrækir JJB ört vaxandi heilsuræktardeild með líkamsræktarstöðvum og knattspyrnuhöllum í tengslum við verslanir félagsins. Frekari upplýsingar er að finna á vefsíðu félagsins, www.jjbcorporate.co.uk. Auðkenni í London Stock Exchange: JJB.L Um Exista Exista hf. starfar á sviði fjármálaþjónustu, einkum vátrygginga og eignaleigu, meðal annars undir merkjum VÍS, Lífís og Lýsingar. Exista er jafnframt alþjóðlegur fjárfestir og meðal annars kjölfestueigandi í Sampo Group, Kaupþingi banka, Bakkavör Group og Símanum. Markmið Exista er að nýta fjárhagslegan styrk sinn til uppbyggingar á starfsemi sinni hér á landi og erlendis. Upplýsingar um Exista hf. er að finna á vefsíðu félagsins www.exista.is.