Dótturfyrirtæki Icelandair Group, Icelandair Cargo og Icelease, hafa fallið frá samningaviðræðum við Avion Aircraft Trading um leigu og kaup á fjórum Airbus A330-200 fraktflugvélum. Viljayfirlýsing um málið var gerð í maí á síðasta ári. Flugvélarnar áttu að afhendast á árunum 2010 og 2011 samkvæmt viljayfirlýsingunni. Skráð listaverð flugvélar af þessari gerð er um 130 milljónir bandaríkjadala. "Þessi ákvörðun okkar er tekin til að draga úr áhættu í rekstri Icelandair Group með hliðsjón af þeirri óvissu í efnahagsmálum sem nú ríkir. Við teljum óráðlegt á þessum tímapunkti að taka á okkur jafn stóra skuldbindingu og föllum frá viljayfirlýsingunni í fullu samráði við samningsaðila okkar”, segir Björgólfur Jóhansson, forstjóri Icelandair Group. "Langtímastefna Icelandair Cargo um vöxt utan heimamarkaðar og rekstur hagkvæmustu flugvélategunda er óbreytt en verður framkvæmd síðar eða með öðrum hætti", segir Pétur J. Eiríksson, framkvæmdastjóri Icelandair Cargo. Icelandair Cargo rekur nú fimm Boeing 757-200 fraktvélar. Félagið hefur vaxið um 20% á ári undanfarin ár og stefnir á svipaðan vöxt næstu árin. Flugfrakt er vaxtargrein, sem reiknað er með að vaxi næstu 20 ár um 6% árlega. Vaxtaráform byggjast á því að örva innri vöxt með auknu flugframboði inn á nýja markaði, og samstarfi við önnur flugfélög. Auk þess að selja frakt í 22 áfangastaði Icelandair þjónar félagið átta áfangastöðum með fraktþotum, sem eru Liege, Brussel, Jönköping, Norrköping, Humberside, East Midlands, New York og Halifax. Nánari upplýsingar: Pétur J. Eiríksson, framkvæmdastjóri Icelandair Cargo Sími: 893-4925 Björgólfur Jóhannsson forstjóri Icelandair Group Sími: 896-1455 Guðjón Arngrímsson, upplýsingastjóri Icelandair Group Sími: 864-5849