Aðalfundur Straums-Burðaráss fjárfestingabanka hf. verður haldinn fimmtudaginn 15. apríl 2008 kl. 16:00 á Hilton Reykjavik Nordica Hotel, Suðurlandsbraut 2, 108 Reykjavík, sal A+B. DAGSKRÁ 1. Skýrsla stjórnar um starfsemi félagsins síðastliðið starfsár. 2. Ársreikningur félagsins ásamt skýrslu endurskoðanda bankans lagður fram til staðfestingar. 3. Ákvörðun um meðferð hagnaðar félagsins á reikningsárinu. 4. Ákvörðun um þóknun til stjórnarmanna félagsins fyrir næsta starfsár og til endurskoðanda fyrir liðið starfsár. 5. Tillaga um starfskjarastefnu félagsins. 6. Stjórnarkjör. 7. Kosning endurskoðanda eða endurskoðunarfélags. 8. Tillögur um að eftirfarandi breytingar verði gerðar á samþykktum félagsins: (a) að 2. málsl. 3. gr. verði breytt þannig að í stað orðsins"fjárfestingabönkum" komi orðið "bönkum", (b) að ný grein 15. a bætist við, svohljóðandi: "Hver hluthafi á rétt á að taka til máls á hluthafafundi. Hafi stjórn ákveðið að hluthafafundur skuli haldinn að hluta til rafrænt skulu hluthafar sem þannig taka þátt í fundi leggja fram spurningar um dagskrá eða framlögð skjöl o.fl. tengt fundinum eigi síðar en fimm dögum fyrir fundinn.", (c) að á eftir 2. mgr. 18. gr. komi ný málsgrein, svohljóðandi: "Félagsstjórn getur ákveðið að hluthafar geti tekið þátt í hluthafafundum rafrænt, þ.m.t. greitt atkvæði, án þess að vera á staðnum. Skylt er þó að gefa hluthöfum kost á að greiða atkvæði um mál sem eru á dagskrá hluthafafunda, bréflega eða rafrænt.", (d) að orðið "virkum" í 3. málsl. 1. mgr. 19. gr. verði fellt út. 9. Tillaga um endurnýjaða heimild félagsins til að kaupa eigin hluti. 10. Önnur mál. FRAMBOÐ TIL STJÓRNAR Framboðsfrestur til stjórnar rennur út kl. 16.00 þriðjudaginn 8. apríl 2008. Framboðum skal skila skriflega til skrifstofu bankans að Borgartúni 25 fyrir þann tíma. Í tilkynningu um framboð til stjórnar skal gefa, auk nafns frambjóðanda, kennitölu og heimilisfangs, upplýsingar um aðalstarf, önnur stjórnarstörf, menntun, reynslu og hlutafjáreign í félaginu. Þá skal einnig upplýsa um hagsmunatengsl við helstu viðskiptaaðila og samkeppnisaðila félagsins, sem og hluthafa sem eiga meira en 10% hlut í félaginu. Upplýsingar um frambjóðendur til stjórnar félagsins munu liggja frammi hluthöfum til sýnis á skrifstofu félagsins eigi síðar en tveimur dögum fyrir hluthafafund. FUNDARGÖGN OG ATKVÆÐASEÐLAR Það er skilyrði þess að hluthafar geti beitt réttindum sínum á fundinum að nafn þeirra hafi verið skráð í hlutaskrá félagsins á aðalfundardegi eða þeir færi með öðrum hætti fullnægjandi sönnur á hlutafjáreign sína. Fundargögn og atkvæðaseðlar verða afhentir hluthöfum eða umboðsmönnum þeirra á fundarstað frá kl. 14:00 á aðalfundardegi. Hluthafar geta greitt atkvæði um mál sem eru á dagskrá fundarins rafrænt. Hluthafar sem hyggjast þannig greiða atkvæði þurfa að hafa aðgang að interneti í gegnum ADSL eða sambærilega tengingu. Nauðsynlegt er að tilkynna um rafræna þátttöku eigi síðar en kl. 16:00, mánudaginn 14. apríl 2008. Nánari upplýsingar um framkvæmd rafrænnar þátttöku í fundinum og tilkynningu vegna hennar má nálgast á heimasíðu félagsins, www.straumur.net. TILLÖGUR Liður 3 í dagskrá: Ákvörðun um meðferð hagnaðar félagsins á reikningsárinu Stjórn Straums-Burðaráss fjárfestingabanka hf. leggur til að greiddar verði 48,9 milljón evrur í arð til hluthafa. Arðurinn nemur 30% af hagnaði félagsins árið 2007 eftir skatta og samsvarar um það bil 0,0047 evrum á hlut. Arðurinn greiðist hluthöfum með hlutabréfum í Straumi-Burðarási fjárfestingabanka hf. þann 13. maí 2008 og skal gengi hlutanna (og þar með fjöldi hlutabréfa sem greidd eru í arð) taka mið af meðalverði viðskipta með hluti í bankanum á aðalfundardegi. Rétt til arðs eiga þeir sem eiga hlutabréf í félaginu við lok viðskipta á aðalfundardegi. Arðleysisdagur er því dagurinn eftir aðalfundardag, þ.e. 16. apríl 2008. Því sem eftir stendur af hagnaði ársins skal ráðstafað til hækkunar á eigin fé bankans. Liður 4 í dagskrá: Ákvörðun um þóknun til stjórnarmanna félagsins fyrir næsta starfsár og til endurskoðanda fyrir liðið starfsár Stjórn Straums-Burðaráss fjárfestingabanka hf. leggur til að stjórnarlaun vegna næsta starfsárs verði sem hér segir: Stjórnarformaður fái 9.300 evrur á mánuði. Varaformaður stjórnar fái 6.200 evrur á mánuði. Aðrir stjórnarmenn fái 3.100 evrur á mánuði. Varamenn fái 850 evrur fyrir hvern setinn fund. Stjórnarmenn fái kr. 850 evrur fyrir hvern setinn fund í undirnefndum stjórnar. Stjórn Straums-Burðaráss fjárfestingabanka hf. leggur til að þóknun til endurskoðenda félagsins fyrir liðið starfsár verði greidd samkvæmt reikningi. Liður 5 í dagskrá: Tillaga um starfskjarastefnu félagsins Stjórn Straums-Burðaráss fjárfestingabanka hf. leggur til að starfskjarastefna félagsins, sem stjórnin hefur samþykkt samkvæmt 79. gr. a hlutafélagalaga nr. 2/1995 með síðari breytingum, verði samþykkt. Liður 7 í dagskrá: Kosning endurskoðanda eða endurskoðunarfélags Stjórn Straums-Burðaráss fjárfestingabanka hf. leggur til að KPMG hf. verði endurkjörið endurskoðunarfélag félagsins fyrir árið 2008. Liður 8 í dagskrá: Tillögur um breytingar á samþykktum félagsins Stjórn Straums-Burðaráss fjárfestingabanka hf. leggur til að eftirfarandi breytingar verði gerðar á samþykktum félagsins: (a) að 2. málsl. 3. gr. verði breytt þannig að í stað orðsins"fjárfestingabönkum" komi orðið "bönkum", (b) að ný grein 15. a bætist við, svohljóðandi: "Hver hluthafi á rétt á að taka til máls á hluthafafundi. Hafi stjórn ákveðið að hluthafafundur skuli haldinn að hluta til rafrænt skulu hluthafar sem þannig taka þátt í fundi leggja fram spurningar um dagskrá eða framlögð skjöl o.fl. tengt fundinum eigi síðar en fimm dögum fyrir fundinn.", (c) að á eftir 2. mgr. 18. gr. komi ný málsgrein, svohljóðandi: "Félagsstjórn getur ákveðið að hluthafar geti tekið þátt í hluthafafundum rafrænt, þ.m.t. greitt atkvæði, án þess að vera á staðnum. Skylt er þó að gefa hluthöfum kost á að greiða atkvæði um mál sem eru á dagskrá hluthafafunda, bréflega eða rafrænt.", (d) að orðið "virkum" í 3. málsl. 1. mgr. 19. gr. verði fellt út. Liður 9 í dagskrá: Tillaga um endurnýjaða heimild félagsins til að kaupa eigin hluti Stjórn Straums-Burðaráss fjárfestingabanka hf. leggur til að endurnýjuð verði heimild stjórnar samkvæmt 8. gr. samþykkta félagsins til að eiga og taka að veði eigin hluti í samræmi við ákvæði VIII. kafla laga nr. 2/1995 um hlutafélög og 29. gr. laga nr. 161/2002 um fjármálafyrirtæki. Heimildin skal vera til 18 mánaða og takmarkast við að samanlögð kaup hluta og veðsetning fari ekki yfir 10% af heildarhlutafé bankans á hverjum tíma. Kaupverð hluta skal vera hæst 20% yfir meðalsöluverði hluta í félaginu skráðu á OMX Nordic Exchange á Íslandi hf. á næstliðnum tveimur vikum áður en kaup voru gerð. Með samþykki tillögunnar fellur niður fyrri heimild til kaupa á eigin hlutum sem samþykkt var á síðasta aðalfundi félagsins. Stjórn Straums-Burðaráss fjárfestingabanka hf.
Aðalfundardagskrá og tillögur
| Source: Straumur-Burðarás Fjárfestingabanki hf.