Hlutafjárútboði Marel Food Systems hf. lauk föstudaginn 6. júní sl. Góð þátttaka var í útboðinu og voru alls 446 áskriftir sem bárust fyrir samanlagt kr. 14.893.950.640 að söluverðmæti eða 167.347.760 hluti. Þetta gerir rétt tæplega 7% umframeftirspurn. Stjórn Marel Food Systems hf. ákvað að nýta ekki heimild til að fjölga þeim hlutum sem í boði voru og verður hlutafé félagsins því aukið um alls 156.440.000 hluti. Eftir að hafa lagt mat á áskriftirnar ákvað stjórn Marel Food Systems hf. að úthluta hluthöfum og fagfjárfestum í samræmi við áskriftir þeirra, en þó þannig að Landsbanki Íslands hf., sem fyrir hlutafjárútboðið var annar stærsti hluthafi félagsins, minnkar hlutfallslega við hlutafjáreign sína í Marel Food Systems hf. Vilji stjórnarinnar stóð til að stuðla að dreifðari hlutafjáreign sem og auknu floti hluta félagsins. Að sögn Harðar Arnarsonar forstjóra Marel Food Systems hf. lýkur fjármögnun félagsins á kaupum Stork Food Systems með þessu hlutafjárútboði. „Marel Food Systems er afar þakklátt fjárfestum fyrir þann stuðning sem þeir hafa sýnt félaginu með þátttöku sinni í útboði þessu sem og í fyrri útboðum. Þannig má benda á að á síðustu tveimur árum hefur Marel Food Systems hf. aflað ríflega 34 milljarða króna með sölu nýrra hluta og skuldabréfa, á tímabili sem markast hefur af miklu ytri vexti, en við tekur tímabil þar sem aðal áherslan verður lögð á innri vöxt og aukningu hagnaðar“ sagði Hörður Arnarson. Fyrirtækjaráðgjöf Landsbanka Íslands hf. hafði umsjón með hlutafjárútboðinu.