Ársreikningur RARIK fyrir árið 2012

Samkvæmt rekstrarreikningi var hagnaður á árinu 1.541 milljónir króna. Rekstrarhagnaður fyrir afskriftir, fjármagnsliði og skatta (EBITDA) var 4.351 milljónir króna eða 38,1% af veltu tíma-bilsins og samanborið við 32,7% á árinu 2011. Handbært fé frá rekstri var 3.257 milljónir króna.

Rekstrarhagnaður af starfsemi RARIK fyrir fjármagnsliði (EBIT) á árinu 2012 var 2.984 milljónir króna sem er rúmlega 34% aukning frá fyrra ári og í samræmi við áætlanir. Vegna veikingar krónunnar og verðlagsbreytinga varð niðurstaða fjármagnsliða neikvæð um tæpar 1.282 milljónir króna, en á árinu 2011 var niðurstaðan neikvæð um 1.233 milljónir króna. Að teknu tilliti til endurmats eigna og tekjuskattsáhrifa þess nemur útreiknaður heildarhagnaður ársins sem færður er á eigið fé 6.180 milljónum króna.

Rekstrartekjur hækkuðu um tæp 6% frá árinu 2011 og voru 11.412 milljónir króna, en rekstrargjöld lækkuðu á milli ára um  1,4% og voru 8.428 milljónir króna.

Fjármagnsgjöld á árinu 2012 voru eins og áður segir neikvæð um 1.282 milljónir króna sem má að stórum hluta rekja til verðbólgu og veikingar krónunnar.

Áhrif Landsnets, sem er hlutdeildarfélag RARIK, á afkomu ársins voru jákvæð um 180 milljónir króna.

Samkvæmt efnahagsreikningi voru heildareignir RARIK í árslok 44.569 milljónir króna, þar af nam endurmat eigna 5.798 milljónum króna. Heildarskuldir námu 19.062 milljónum króna, eigið fé var 25.507 milljónir króna og eiginfjárhlutfall því 57,2% samanborið við 51,9% í árslok 2011.   Stjórn RARIK samþykkir að greiddur verði út arður á árinu 2013 sem nemur allt að 310 milljónum króna.

Ársreikningur RARIK  er gerður samkvæmt alþjóðlegum reikningsskilastöðlum. 

Horfur

Horfur í rekstri RARIK á árinu 2013 eru sambærilegar og á liðnu ári, en afkoman ræðst hins vegar af almennri þróun efnahagsmála, verðlagsþróun og gengi krónunnar. Áætlanir ársins 2013 gera ráð fyrir hagnaði af rekstri félagsins í samræmi við langtíma fjárfestingaþörf í dreifikerfinu. Gjaldskrá fyrir dreifingu var hækkuð um áramótin og var hækkunin að jafnaði 8% í dreifbýli en gjaldskrá fyrir alla almenna notkun var óbreytt í þéttbýli. Gera má ráð fyrir að á næstu árum þurfi enn að auka þann mun sem er á gjaldskrám í dreifbýli og þéttbýli. Ekki hefur verið staðið við markmið laga að jafna þann mun með framlagi á fjárlögum og hefur RARIK því haldið aftur af hækkunum í dreifbýli. Gjaldskrá RARIK í dreifbýli er nú umtalsvert hærri en í þéttbýli.

Vextir erlendra lána hafa verið hagstæðir undanfarin misseri og gert er ráð fyrir að þeir haldist sambærilegir út árið 2013.

Gert er ráð fyrir sambærilegum fjárfestingum í dreifikerfum og á fyrra ári. Til viðbótar hefðbundinni endurnýjun í dreifikerfinu verður haldið áfram vinnu við hitaveitu til Skagastrandar og unnið að rannsóknum vegna hitaveitu til Hafnar. Á síðasta ári var gefinn út skuldabréfaflokkur að upphæð 2.000 milljónir, en ákveðið að selja ekki nema helming þeirrar upphæðar. Ekki hefur verið ákveðið hvort fyrirtækið nýti sér heimild til sölu á öllum skuldabréfaflokknum á þessu ári.

 Á árinu 2013 er gert ráð fyrir að orkusala og dreifing aukist lítillega, sem er í samræmi við þróun síðustu ára.

Helstu stærðir samstæðureiknings RARIK, allar fjárhæðir í milljónum króna.

Ársreikningur RARIK 2012 var samþykktur á fundi stjórnar þann 26. febrúar 2013 og heimilaði stjórn birtingu hans í Kauphöll.

Nánari upplýsingar veitir Tryggvi Þór Haraldsson, forstjóri RARIK í síma 528-9000.