Ársreikningur RARIK fyrir árið 2013

Samkvæmt rekstrarreikningi var hagnaður á árinu 1.947 milljónir króna sem er heldur meiri en gert var ráð fyrir í áætlunum. Hækkun frá árinu 2012 var rúm 26% en þá var hagnaður ársins 1.541 milljón króna. Rekstrarhagnaður fyrir afskriftir, fjármagnsliði og skatta (EBITDA) var 4.300 milljónir króna eða 36,5% af veltu tímabilsins, samanborið við 38,1% á árinu 2012. Handbært fé frá rekstri var 3.541 milljón króna.

Rekstrarhagnaður af starfsemi RARIK fyrir fjármagnsliði (EBIT) á árinu 2013 var 2.684 milljónir króna sem er rúmlega 10% lækkun frá fyrra ári. Talsverð styrking krónunnar gerði það að verkum að þrátt fyrir nokkra verðbólgu varð niðurstaða fjármagnsliða einungis neikvæð um 867 milljónir króna, en á árinu 2012 var niðurstaðan neikvæð um 1.282 milljónir króna.

Rekstrartekjur hækkuðu um rúm 3% frá árinu 2012 og voru 11.793 milljónir króna og rekstrargjöld hækkuðu á milli ára um rúm 8% og voru 9.108 milljónir króna. Hækkun gjalda umfram verðlag má að verulegu leyti rekja til 18% hækkunar á afskriftum.

Áhrif Landsnets, sem er hlutdeildarfélag RARIK, á afkomu ársins voru jákvæð um 491 milljón króna á móti 180 milljónum á árinu 2012.

Samkvæmt efnahagsreikningi námu heildareignir RARIK í árslok 46.787 milljónum króna. Heildarskuldir námu 19.643 milljónum króna, eigið fé var 27.144 milljónir króna og er eiginfjárhlutfall því 58% samanborið við 57,2% í árslok 2012.

Ársreikningur RARIK ohf. er gerður samkvæmt alþjóðlegum reikningsskilastöðlum. 

Horfur

Horfur í rekstri RARIK á árinu 2014 eru góðar, en gert er ráð fyrir að hagnaður ársins verði svipaður og á árinu 2013. Áætlanir ársins 2014 gera ráð fyrir að forgangsorka og dreifing aukist lítillega, sem er í samræmi við þróun undanfarinna ára. Gjaldskrá fyrir dreifingu var hækkuð í upphafi ársins 2014 um 4,5% í dreifbýli en gjaldskrá fyrir alla almenna notkun var óbreytt í þéttbýli. Gera má ráð fyrir að á næstu árum þurfi enn að auka þann mun sem er á gjaldskrám í dreifbýli og þéttbýli. Samkvæmt fjárlögum 2014 áforma stjórnvöld að auka verulega fjármagn til verðjöfnunar milli dreifbýlis og þéttbýlis og þar með jafna þennan mun að mestu á næstu þremur árum.

Ný hitaveita var tekin í notkun á árinu á Skagaströnd. Gjaldskrár hitaveitna RARIK breyttust ekki á síðasta ári, en gert er ráð fyrir að gjaldskrár muni fylgja verðlagi á árinu 2014. Orkusalan gerir ráð fyrir að hækka verðskrá sína í samræmi við hækkun Landsvirkjunar á heildsöluverði til Orkusölunnar.

Vextir erlendra lána hafa verið hagstæðir undanfarin misseri og gert er ráð fyrir að þeir haldist sambærilegir út árið 2014.

Gert er ráð fyrir sambærilegum fjárfestingum í dreifikerfum og á fyrra ári, en minni framkvæmdum í hitaveitum. Fjárfestingar Orkusölunnar verða svipaðar og á síðasta ári. Á síðasta ári var gefinn út skuldabréfaflokkur að upphæð 1.000 milljónir á hagkvæmum kjörum, en á næstu þremur árum er þörf á umtalsverðri endurfjármögnun. Ekki hefur verið tekin ákvörðun um að hve miklu leyti það verður gert á árinu 2014, en það ræðst af aðstæðum á fjármálamarkaði.

Helstu stærðir samstæðureiknings RARIK, allar fjárhæðir í milljónum króna.

Ársreikningur RARIK 2013 var samþykktur á fundi stjórnar þann 27. febrúar 2014 og heimilaði stjórn birtingu hans í Kauphöll.

Nánari upplýsingar veitir Tryggvi Þór Haraldsson, forstjóri RARIK í síma 528-9000.