Afkoma Hafnarfjarðarbæjar umfram væntingar
Rekstrarniðurstaða samstæðu Hafnarfjarðarbæjar, A- og B-hluta, var neikvæð um 499 m.kr. á fyrri helmingi ársins 2023 en fjárhagsáætlun gerði ráð fyrir 707 m.kr. neikvæðri niðurstöðu. Afkoman er því 208 m.kr. betri en áætlanir gerðu ráð fyrir. Rekstur samstæðunnar fyrir afskriftir og fjármagnsliði (EBITDA) var jákvæður um 2.215 m.kr. sem er 830 m.kr. umfram áætlun. Veltufé frá rekstri nam 1.315 m.kr. í lok júní sem er umtalsvert umfram áætlun.
Rekstrarniðurstaða A-hluta Hafnarfjarðarbæjar var neikvæð um 603 m.kr. fyrstu sex mánuðina en áætlun gerði ráð fyrir 991 m.kr. neikvæðri rekstrarniðurstöðu. Afkoman er því 388 m.kr. betri en áætlanir gerðu ráð fyrir. Helstu frávik frá áætlun hjá A-hluta eru í fjármagnsliðum sem eru 315 m.kr. yfir áætlun á tímabilinu en á móti kemur að tekjur eru umfram áætlun. Rekstur A-hluta fyrir afskriftir og fjármagnsliði (EBITDA) var jákvæður um 1.408 m.kr. sem er 752 m.kr. umfram áætlun.
Heildareignir A- og B-hluta samkvæmt efnahagsreikningi 30. júní 2023 námu 86,1 ma.kr. og skuldir og skuldbindingar 58,4 mö.kr. Eigið fé var 27,7 ma.kr. og eiginfjárhlutfall samstæðunnar 32,2%.
Rósa Guðbjartsdóttir bæjarstjóri:
„Rekstrarafkoma á fyrri helmingi ársins er ásættanleg í núverandi efnahagsumhverfi verðbólgu og hárra vaxta. Afkoman er í raun umtalsvert betri en áætlanir gerðu ráð fyrir. Nú kemur sér vel að lögð hefur verið áhersla á aðhald í rekstri og lækkun skuldahlutfalla undanfarin ár. Á næstu misserum bíða sveitarfélaganna miklar rekstraráskoranir til að standa undir lögbundinni þjónustu. Við gerð fjárhagsáætlunar komandi árs munum við áfram leggja áherslu á gætni í útgjöldum og rekstri Hafnarfjarðarbæjar en gæta þess um leið að tryggja íbúum trausta þjónustu.“
Árshlutareikningur Hafnarfjarðarbæjar, janúar til júní 2023, var lagður fyrir bæjarráð 24. október sl. Árshlutareikningurinn er óendurskoðaður og ókannaður og er aðgengilegur á vef Hafnarfjarðarbæjar www.hafnarfjordur.is.
Attachment
