Frosti Ólafsson, framkvæmdastjóri Olís, hefur óskað eftir því að láta af störfum frá og með næstu áramótum. Frosti kemur til með að hefja störf hjá alþjóðlega ráðgjafarfyrirtækinu McKinsey & Company á þeim tíma.
Ingunn Svala Leifsdóttir hefur verið ráðin í starf framkvæmdastjóra Olís og tekur við hlutverkinu um næstu áramót. Ingunn Svala hefur fjölþætta stjórnunarreynslu úr íslensku viðskiptalífi, en hún starfaði m.a. síðast sem framkvæmdastjóri rekstrar hjá Dohop og þar á undan var hún framkvæmdastjóri rekstrar hjá Háskólanum í Reykjavík. Ingunn situr í stjórnum Kviku banka og Ósa hf.
Finnur Oddsson, forstjóri Haga:
Frosti hefur á síðustu árum leitt Olís í gegnum umfangsmikið ferli breytinga og hagræðingar með það að leiðarljósi að efla þjónustu við viðskiptavini og búa félagið um leið undir möguleg áhrif orkuskipta á starfsemina. Áhrif þessarar vinnu eru nú að stórum hluta komin fram í rekstri Olís, sem hefur gengið vel á síðustu misserum og styrkt stöðu sína á eldsneytis- og þægindavörumarkaði. Það hefur verið ánægjulegt að starfa með Frosta að umbreytingu Olís sem hefur sjaldan staðið betur. Fyrir hönd Olís og Haga þakka ég Frosta frábært starf í þágu félaganna síðustu ár og óska honum góðs gengis í nýjum og spennandi verkefnum.
Það er ánægjuefni að geta tilkynnt um ráðningu Ingunnar Svölu Leifsdóttur í starf framkvæmdastjóra Olís frá næstu áramótum. Ingunn býr að víðtækri reynslu sem stjórnandi og stjórnarmaður í íslensku atvinnulífi sem ég er sannfærður um að muni nýtast vel til að fylgja eftir árangursríku umbótastarfi síðustu missera, í samstarfi við öflguna hóp starfsfólks Olís. Það eru spennandi tímar framundan hjá Olís þar sem saman fer áframhaldandi aðlögun rekstrar að breyttum neysluvenjum á eldsneytismarkaði og uppbygging þjónustuframboðs á smásölu- og fyrirtækjamarkaði.
Frosti Ólafsson:
Það hafa verið mikil forréttindi að starfa fyrir Olís undanfarin ár. Við höfum farið í gegnum verulegar skipulagsbreytingar og endurmörkun á félaginu. Vegferðin hefur gengið virkilega vel og þar ber fyrst og fremst að þakka því öfluga starfsfólki sem stendur að baki Olís. Mig langar til að þakka þessum frábæra hópi fyrir skemmtilegan tíma og hef um leið mikla trú á því að framhaldið sé í traustum höndum hjá Ingunni Svölu.
Ingunn Svala Leifsdóttir:
Ég er mjög spennt fyrir þessu tækifæri, að taka við keflinu sem framkvæmdastjóri Olís. Ég veit að ég tek við góðu búi frá Frosta og frábæru teymi starfsfólks Olís, sem ég hlakka til að kynnast á næstunni. Það eru forréttindi að starfa hjá einni af sterkustu samstæðum landsins sem Hagar sannarlega eru og öllu því öfluga fólki sem þar starfar og ég fer með þakklæti og tilhlökkun inn í spennandi tíma sem framundan eru hjá félaginu.
