Helstu niðurstöður 1. ársfjórðungs 2025
- Vörusala nam 37.786 millj. kr. sem er aukning um 17,3% milli ára en hækkaði um 3,0% án áhrifa Lyfju sem kom inn í samstæðuna frá júlí 2024.
- Framlegð af vöru- og þjónustusölu nam 9.212 millj. kr. sem er aukning um 31,0% á milli ára en 10,5% án áhrifa Lyfju.
- Framlegðarstig nam 24,4% og hækkar um 2,6 p.p. frá 1F 2024 en lækkar um 0,1 p.p frá síðasta ársfjórðungi.
- Laun og starfsmannakostnaður nam 5.305 millj. kr. og eykst um 34,4% milli ára en 12,0% án áhrifa Lyfju.
- EBITDA nam 2.489 millj. kr. og hækkar um 31,2% milli ára en 13,1% án áhrifa Lyfju.
- Hagnaður fjórðungsins nam 279 millj. kr. og hækkar um 77 millj. kr. milli ára.
- Eigið fé nam 42.421 millj. kr. og er eiginfjárhlutfallið 36,8% í lok 1F 2025 samanborið við 37,9% í lok árs 2024. Félagið úthlutaði arði fyrir 1.400 millj. kr í mars sem greitt var til hluthafa 9.apríl sl.
- EBITDA spá félagsins fyrir árið 2025 er óbreytt og nemur 14.400 – 14.800 millj. kr.
Ásta S. Fjeldsted, forstjóri:
- Rekstur félagsins á fyrsta ársfjórðungi ársins gekk ágætlega og var í takti við áætlanir. Vörusala jókst í flestum vöruflokkum og var aukningin 17,3% milli ára (2,8% án áhrifa Lyfju) og jókst afgreiðslufjöldi um 10,2% (1,4% án áhrifa Lyfju).
- Framlegðarstig styrktist í öllum vöru- og þjónustuflokkum samstæðunnar og hækkar heilt yfir um 2,6 p.p. milli ára. Framlegð af vöru- og þjónustusölu nam 9.212 millj. kr. og hækkar um 31,0% milli ára (10,5% án áhrifa Lyfju).
- Rekstrarkostnaður fjórðungsins hækkar um 28,9% á milli ára (8,3% án áhrifa Lyfju) en stöðgildum fjölgar um 281 milli ára (249 vegna Lyfju).
- EBITDA fjórðungsins nam 2.489 millj. kr. og hækkar um 31,2% milli ára en hækkar um 13,1% án áhrifa Lyfju.
- Hagnaður fjórðungsins 2024 nam 279 millj. kr. og hækkar um 35,2% á milli ára eða um 77 millj. kr. (23% án áhrifa Lyfju).
- Áhrif tollahækkana á innflutning til Bandaríkjanna sem og mótvægisaðgerðir annarra landa sem tilkynnt var um í apríl, hafa leitt til óvissu og óstöðugleika á mörkuðum. Mat stjórnenda er að þetta muni ekki hafa veruleg áhrif á rekstur samstæðunnar á árinu.
- Framundan er sumarið sem er mikilvægasti tími ársins fyrir félagið og er útlitið ágætt. EBITDA spá félagsins fyrir árið 2025 er óbreytt og nemur 14.400 – 14.800 millj. kr.
Það sem bar hæst á fjórðungnum og lykilmánuðir framundan:
- Krónan hefur fengið afhent húsnæði á Fitjabraut 5 í Reykjanesbæ en þar verður opnuð glæsileg ný verslun í sumar og minni verslun félagsins lokað á sama tíma. Krónan í Vallakór er kominn í allsherjar yfirhalningu en ný endurbætt verslun verður opnuð í byrjun júní.
- Yrkir kláraði kaup á Hvaleyrarbraut 3 í Hafnarfirði í apríl, húsnæði og lóð á besta stað við höfnina, sem hýsir m.a. verslun Krónunnar. Kaupin eru hluti af stefnu félagsins um að eiga lykilstaðsetningar til framtíðar með möguleika á frekari þróun í takt við skipulag bæjarins.
- Yrkir hefur unnið að undirbúningi nýrrar fjölorkustöðvar N1 á Fiskislóð, á sömu lóð og Krónan og ELKO eru staðsett úti á Granda. Eldsneytisdælur verða opnaðar 1. maí nk. og rafhleðslur síðar í sumar. Á sama tíma verður eldsneytisdælum lokað á Ægisíðu sem er liður í samkomulagi við Reykjavíkurborg frá árinu 2021.
- Lyfju appið var valið App ársins og hlaut einnig verðlaun fyrir hönnun og viðmót á SVEF verðlaunum ársins sem haldin voru á fjórðungnum.
- Sókn á einstaklings- og fyrirtækjamarkað heldur áfram hjá ELKO, Krónunni, Lyfju og N1. Mikil áhersla er á stafræna upplifun og verða nýjar spennandi lausnir kynntar á árinu.
- Fyrsta nýtingartímabil kaupréttarkerfis starfsmanna Festi er nú í maí en á aðalfundi 6. mars 2024 samþykktu hluthafar tillögu frá stjórn félagsins um að komið yrði á fót kaupréttarkerfi fyrir allt fastráðið starfsfólk samstæðunnar þar sem því var boðið að kaupa hlutabréf á föstu gengi fyrir allt að 500 þús.kr. í þrjú skipti yfir þrjú ár.
- Í samræmi við efni kaupréttaráætluninnar verður starfsfólki sem hafið hefur störf innan samstæðunnar eftir fyrstu úthlutun boðin þátttaka nú í kerfinu út líftíma þess (2 ár).
„Rekstur fyrsta ársfjórðungs gekk samkvæmt áætlun. Reksturinn er stöðugur og vöxturinn í takt við væntingar. Fjárhagur félagsins er sterkur og hugur stjórnenda og starfsfólks er samstilltur á tækifærin sem felast í öflugri samstæðu og útvíkkun þjónustu hennar og vöruúrvali.
Sú óvissa sem skapaðist á mörkuðum í apríl með stefnubreytingum og boðun tollahækkana nýs forseta Bandaríkjanna hefur haft töluverð áhrif á heimsmarkaðsverð olíu og gjaldeyrismarkað sem sveiflast dag frá degi. Hvort og þá hver áhrif þessa verða á ferðaþjónustu eða aðrar atvinnugreinar í landinu er óljós enn sem komið er. Framundan eru mikilvægir sumarmánuðir og munum við nú sem endranær fylgjast vel með og spila vel úr þeim spilum sem við höfum á hendi. Með sterkum stoðum, tæknilegum innviðum og ólíkum rekstrareiningum sem saman mynda heild af framboði nauðsynjavara- og þjónustu um land allt þá eru horfurnar góðar fyrir árið í heild.“ segir Ásta S. Fjeldsted forstjóri Festi.
Viðhengi
