Stjórn Eimskips hefur tekið ákvörðun um framkvæmd endurkaupaáætlunar, samkvæmt heimild í grein 11.2 í samþykktum félagsins sem samþykktar voru á hluthafafundi Eimskips þann 24. júlí 2018 í þeim tilgangi að lækka útgefið hlutafé félagsins.
Heimild er til að kaupa hlutabréf í félaginu í 18 mánuði frá hluthafafundinum með þeim fyrirvara að félagið ásamt dótturfélögum þess megi einungis eiga mest 10% hlutafjár þess. Endurkaupin munu að hámarki nema 3.000.000 hluta eða um 1,6% af útgefnum hlutum í félaginu, á kaupverði sem má þó ekki fara yfir kr. 500.000.000,- að markaðsvirði. Gert er ráð fyrir að endurkaup samkvæmt áætluninni hefjist þriðjudaginn 11. júní og mun áætlunin vera í gildi fram til 24. janúar 2020, nema skilyrði um hámarkskaup verði uppfyllt fyrir þann tíma.
Gengi á hlut skal ekki vera hærra en hæsta gengi af eftirfarandi; lokagengi síðasta viðskiptadags, síðustu óháðu viðskipta eða í hæsta fyrirliggjandi óháða kauptilboði á þeim markaði sem viðskipti eru átt með hlutabréf í Eimskip. Hámarksmagn hvers viðskiptadags er fjórðungur af meðaltali daglegra viðskipta með hlutabréf félagsins á aðalmarkaði síðustu 20 viðskiptadaga. Hámarksfjöldi leyfilegra hluta á hverjum viðskiptadegi tekur því breytingum á því tímabili sem endurkaupin eiga sér stað, en hefst á 89.628 hlutum þann 11. júní 2019.
Endurkaupaáætlun verður framkvæmd af Íslandsbanka sem tekur allar viðskiptaákvarðanir er varða kaup á hlutum og tímasetningu kaupanna, óháð félaginu. Framkvæmd endurkaupaáætlunarinnar verður í samræmi við lög um hlutafélög nr. 2/1995 og viðauka við reglugerð um innherjaupplýsingar og markaðssvik nr. 630/2005. Viðskipti með eigin hluti í samræmi við endurkaupaáætlunina verða tilkynnt eigi síðar en við lok sjöunda viðskiptadags eftir að viðskiptin fara fram.
Í dag á Eimskip 360.770 hluti að nafnverði í félaginu.
Vilhelm Már Þorsteinsson, forstjóri Eimskips
„Formlegri endurkaupaáætlun félagsins er nú ýtt úr vör í þágu hluthafa. Arðgreiðsla félagsins á árinu 2019 var hófleg, sjóðstaða er sterk sem og fjárhagslegur styrkur félagsins. Því er ákveðið að nýta heimild í samþykktum félagsins og samkvæmt ákvörðun hluthafafundar 24. júlí 2018 til að fara í formlega endurkaupaáætlun.“
Nánari upplýsingar veitir Edda Rut Björnsdóttir, markaðs- og samskiptastjóri í síma 825-3399 eða investors@eimskip.is
Eimskip er leiðandi flutningafyrirtæki á Norður-Atlantshafi með tengingar við alþjóðlega markaði og sérhæfingu í flutningsmiðlun um allan heim, með þá framtíðarsýn að vera framúrskarandi í flutningalausnum og þjónustu.